Din isteri jáne azamattyq qoǵam ministrligi tarapynan ǵibadat etý bólmeleri (namazhana) men dini ádebietter satatyn kitap dúkenderine qoiylatyn talaptar qaita qaraldy.
Dindar azamattardyń suranystaryn nazarǵa ala otyryp, jáne bir mezgilde memlekettik saiasattyń zaiyrly qaǵidattaryn saqtai otyryp, Ǵibadat úilerinen (ǵimarattarynan) tys jerlerde dini is-sharalardy ótkizýge arnalǵan úi-jailardyń jáne dini ádebietti taratý úshin arnaiy statsionarlyq úi-jailardyń ornalastyrylýyn aiqyndaý jónindegi nusqaýlyqtyń jańa redaktsiiasy ázirlendi.
Nusqaýlyqtaǵy túbegeili jańalyq retinde osyndai úi-jailardyń memlekettik uiymdar men mekemelerden 300 metrden kem emes qashyqtyqta ornalasýyna qoiylǵan burynǵy tyiymnyń kúshiniń joiylǵanyn aita ketý kerek.
Mundai talap búgingi eldi mekenderdiń ornalasý erekshelikterine jaýap bere almaidy.
Nusqaýlyqtyń jańa redaktsiiasynda temir jol jáne avtovokzaldarda, áýejailar men porttarda, iaǵni adamdar eriksiz túrde uzaq ýaqyt bolatyn oryndarda dini is-sharalardy ótkizýge arnalǵan úi-jailardy ashýǵa qoiylǵan tyiym alynyp tastaldy.
300 metr boiynsha shekteýler bilim berý mekemelerine qatysty kúshinde qaldy. Bul talap rýhani (dini) bilim berý uiymdaryna qatysty qoldanylmaidy.
Osy rette, ǵibadat etý bólmelerin ashý kezinde belgili bir talaptar saqtalýy tiis.
Mysaly, dini is-sharalardy ótkizýge arnalǵan úi-jailar dáret alý úshin qajetti sanitarlyq torappen qamtamasyz etilýi tiis jáne jalpy alǵanda Qazaqstan Respýblikasynyń qoldanystaǵy zańnamasyna sáikes sanitariialyq-epidemiologiialyq talaptarǵa sáikes kelýi kerek.
Atalǵan talaptar ǵibadat etý rásimderin oryndaý kezinde qolaily jaǵdailardy qamtamasyz etý maqsatynda engizilip otyr.
Nusqaýlyq jobasynda qoldanystaǵy zańnamaǵa sáikes nysannyń menshik iesiniń úi-jaidaǵy sanitarlyq, órt jáne basqa qaýipsizdikter úshin jaýap beretindigi kórsetilgen.
Tiisti normativtik qujat kelisý protsesinen ótken soń ǵibadat etý bólmeleri, sonyń ishinde namazhanalar, jańa jaǵdaida jumys isteitin bolady.
Dindarlar úshin mundai úi-jailarda ǵibadat etý rásimderi qaýipsiz jáne barynsha qolaily jaǵdailarda oryndaý múmkindikterimen qamtamasyz etiletin bolady.
Jalpy alǵanda, ǵibadat etý bólmelerin ashý týraly sheshim osy nysandardyń menshik ieleri tarapynan qabyldanatyn bolady.
Ázirlengen qujattyń tolyq ataýy: Dini ádebietti jáne dini mazmundaǵy ózge de aqparattyq materialdardy, dini maqsattaǵy zattardy taratý úshin arnaiy statsionarlyq úi-jailardyń, sondai-aq ǵibadat úilerinen (ǵimarattarynan) tys jerlerde dini is-sharalardy ótkizýge arnalǵan úi-jailardyń ornalastyrylýyn aiqyndaý jónindegi nusqaýlyq.
