El tabaldyryǵy ádette áýejaidan bastalady. Qai elge baǵyt alǵanda da aldymen el astanasynyń áýejaiy atalady, sol áýejaidyń ataýyn jadymyzda jattap qalamyz. Sondyqtan da Úkimettiń Astananyń halyqaralyq áýejaiyna Nursultan Nazarbaevtyń atyn berý týraly qaýlysy bul nysannyń el ómiri úshin de, eldiń álemdegi orny úshin de qandailyq erekshe máni bar ekenin dóp basýdyń kórinisi dep bilemiz.
Bul sheshimniń oryndylyǵyn dáleldep sharshap-shaldyǵýdyń jóni de joq. Bizdiń el retinde qaz basýymyzdan bastap, qalyptasýymyz, qanat qataitýymyz, Qazaqstan qyranynyń álem aspanyna parlap ushýy, alysty da, jaqyndy da moiyndatýy, eren isterdi atqarýymyz, ekonomikamyzdyń qýattanýy, halyqtyń ál-aýqatynyń artýy, jahandyq, jalpyadamzattyq mańyzdy máselelerdi sheshýge tikelei aralasatyn, qiyn túiinderdi tarqatýǵa tikelei yqpal ete alatyn myǵym memleketke ainalýymyz ... – qysqasy, el bolýymyzdyń, el bolǵanda da shirek ǵasyrlyq ýaqyttyń ishinde aldymen álemdegi damyǵan elý eldiń qataryna qosyla alǵan, ol belesti baǵyndyrǵan soń ozyq otyzdyqtan oiyp oryn alý mindetin oidaǵydai sheship kele jatqan eńseli el bolýymyzdyń bastaýshysy, ultty uly maqsattarǵa uiystyrýshy Elbasymyz Nursultan Ábishuly Nazarbaev ekendigin aityp jatýdyń ózi búginde artyq. Sondyqtan da Parlament depýtattary Táýelsizdiktiń 25 jyldyǵy Deklaratsiiasynda Tuńǵysh Prezident – Elbasynyń eren eńbegin Konstitýtsiiada atap kórsetý, Nursultan Nazarbaevtyń esimin eldiń aitýly nysandarynda aishyqtaý qajettigin usynǵan bolatyn. Kóptiń kókeiinen shyqqan ol usynystar júzege asa bastaǵany qýantarlyq.
Álemde áýejailarǵa áigili tulǵalardyń atyn berý tájiribesi talaidan bar. Buǵan mysal jetkilikti. 57 elde boldym. Keibirine ǵana óz betimmen bardym. Bárine derlik sońǵy shirek ǵasyr ishinde jýrnalist retinde jol tústi, iaǵni el kórý, jer kórýdiń mol múmkindigi táýelsizdik jyldarynda ǵana ashyldy. Sonda kóptegen elderde osyndai qurmet kórsetý mysaldaryna jolyqtyq. Ondai áýejailar tizimin Napoleon atyndaǵy, Ben-Gýrion atyndaǵy, Atatúrik atyndaǵy, Vashington atyndaǵy, Frederik Shopen atyndaǵy, Dalles atyndaǵy, Kopernik atyndaǵy, Leh Valensa atyndaǵy, Motsart atyndaǵy, Djon Lennon atyndaǵy, Sent Ekziýperi atyndaǵy, Geidar Aliev atyndaǵy, Djon Kennedi atyndaǵy, Indira Gandi atyndaǵy, Federiko Fellini atyndaǵy, Hose Marti atyndaǵy, Hristofor Kolýmb atyndaǵy, Sharl-de-Goll atyndaǵy ... dep jalǵastyra berýge bolady. Tek memleket basshylarynyń atymen atalǵan áýejailardyń sanynyń ózi otyzdan asady eken. Demek, Úkimettiń bul sheshimi – ýaqyty jetken, órkeniettik úrdisinde qabyldanǵan, asylymyzdy ardaqtaityn, basymyzdaǵy baqty baǵalaityn el ekenimizdi kemel kórsetetin kelisti sheshim.
Nursultan Nazarbaev halyqaralyq áýejaiyna alǵashqy qonaqtar qasietti Qadir túninde kelgeni qandailyq ǵanibet boldy deseńizshi!
Saýytbek ABDRAHMANOV,
Parlament Májilisiniń depýtaty, Qazaqstan halqy Assambleiasy depýtattyń tobynyń basshysy
