«Atyraý-Nur-Sultan» áýe reisiniń jolaýshysynan 2500 AQSh dollary men 200 myń teńge urlaǵan Qaraǵandy oblysynyń turǵyny ustaldy, dep habarlaidy "Ult aqparat".
Kóliktegi politsiia departamenti baspasóz qyzmetiniń málimetinshe, 2019 jylǵy 24 jeltoqsanda Nur-Sultan qalasynyń halyqaralyq áýejaiyndaǵy jelilik politsiia bólimine «Skat» áýe kompaniiasynyń «Atyraý-Nur-Sultan» baǵytyndaǵy áýe reisiniń 66 jastaǵy jolaýshysy shaǵymdanǵan. Onyń aitýynsha, júk bólimshesinde belgisiz adam jeke zattary men 2500 AQSh dollary jáne 200 myń teńge kólemindegi aqsha qarajaty salynǵan júgin urlap ketken. Sondai-aq, ol júktiń Nur-Sultan qalasyna ushyp kelgende joǵalǵanyn aitqan.
«Sol kúni-aq kólik politseilerimen QR QK 188-babynyń 3 bóligimen, iaǵni, iri mólsherde jasalǵan urlyq boiynsha sotqa deiingi tergeý amaldary bastalǵan.
Jedel-izdestirý is-sharalaryn júrgizý barysynda elordalyq áýejaidyń jelilik politsiia bóliminiń kriminaldyq politsiia qyzmetkerleri osy reispen ushyp kelgen jolaýshyny ustady. Ol Qaraǵandy oblysynyń 26 jastaǵy turǵyny bolyp shyqty. Qaskúnem tasymaldaǵysh bagaj lentasynda jábirlenýshige tiesili zattar men aqshalardy jasyryn urlap ketkendigin moiyndady. Urlanǵan zattar men aqsha tárkilenip, iesine qaitaryldy.
Nur-Sultan qalasy Esil aýdandyq №2 sotynyń úkimimen azamat qylmystyq quqyq buzýshylyq jasaǵany úshin kináli dep tanylyp, oǵan 3 jyl 6 ai merzimge bostandyǵyn shekteý túrindegi jaza taǵaiyndaldy», - dep atap ótedi departamentten.
