Eskalator. Kórneki foto: pexels.com
Aqtaý áýejaiy eskalatorda jaraqat alǵan úsh jasar qyzǵa 2 mln teńge tóleýge mindetteldi, dep habarlaidy Ult.kz joǵarǵy sottyń resmi paraqshasyna silteme jasap.
Bul oqiǵa byltyr jazda bolǵan. Elordanyń turǵyny kámeletke tolmaǵan eki balasymen Astanadan Aqtaýǵa ushyp barǵan. Jolaýshylar terminalynan shyqqannan keiin balalardyń bireýi – eki jasar qyz shyǵý esikteri arqyly áýejaiǵa jalǵyz ózi qaita kirip, eskalatorǵa júgirip barǵan. Sol jerde qolyn qozǵalatyn mehanizmge qoiǵanda saýsaǵyn jaraqattap alǵan. Endi 10 jasqa tolǵanda saýsaqty túzetý otasyn jasaýǵa týra keledi.
Jábirlenýshiniń anasy sotqa aryz túsirip, moraldyq shyǵyndy áýejaidan óteýdi surap talap etti. Al áýejaidyń ókili jazataiym oqiǵa áýejai qyzmetkerleriniń kinásinen emes, balanyń eskalatorǵa óz betinshe jaqyndaǵanynan boldy dep otyr.
"Alaida sotta qaralǵan beinematerialdarda áýejai inspektorynyń ǵimaratqa shyǵý esikteri arqyly kirgen balanyń qolyn ustaǵany, biraq onyń sońynan ilespek bolǵan anasynyń kóńilin aýlap, ony bosatqany anyqtalǵan. Inspektor áieldi áýejai ǵimaratyna kirgizbei, balany qaraýsyz qaldyrǵan, qyz bala eskalatormen kóterilip, sol jerde jaraqat alǵan", - delingen sot úkiminde.
Osylaisha, áýejai qyzmetkerleri kishkentai búldirshinniń terminal ǵimaratyna úlkenderdiń ertip júrýinsiz kirýine jol bergen.
Sot úkimimen Aqtaý áýejaiy eskalatorda jaraqat alǵan úsh jasar qyzǵa 2 mln teńge tóleýge mindetteldi. Sheshim zańdy kúshine endi.
