Parlament Senatynda zań shyǵarýshylyq protsesti jetildirý taqyrybyna arnalǵan parlamenttik tyńdaýda depýtattar saladaǵy kemshilikterdi atady, dep habarlaidy QazAqparat.
«Parlament depýtattarynyń basty mindeti – elge de, el azamattaryna da paidaly, sapaly zań aktilerin daiarlaý, jetildirý jáne qabyldaý. Al olardyń tiimdiligin anyqtaýdyń basty kriteriii – qoǵamdyq monitoring júrgizý. Biz qabyldaǵan zańdardy qoǵam, BAQ, áleýmettik jeli, jalpy halyq qalai qabyldady? Jetistigi nede? Kemshiligi qandai? Onyń bárin «Ádilet» quqyqtyq júiesi, Parlamentarizm Institýty arqyly qadaǵalap, qoǵamdyq pikirdi udaiy basshylyqqa alyp otyrýymyz kerek» - dedi Muhtar Qul-Muhammed.
Senator Murat Baqtiiaruly Parlamentke ratifikatsiialaýǵa kelip jatqan zań jobalarynyń, olardyń qosymshalaryndaǵy halyqaralyq qujattardyń memlekettik tildegi nusqalaryndaǵy sapasyzdyqty atap ótti. Ministrlikter men vedomstvolar qyzmetkerleri pysyqtalmaǵan ári tekserilmegen materildardy jiberedi.
«Osy ýaqyt ishinde memlekettik organdar mamandary termindik qoldanystar men stildi meńgeretindei boldy. Biraq memorgandar qyzmetkerleriniń qazaq tilindegi halyqaralyq qujattardy Parlamentke qatesiz jiberýge shamasy ári yntasy joq siiaqty. Tipti, keibir jaǵdailarda qujat jobalarynyń qazaq tilindegi mátini men orys tilindegi mátini mazmuny jaǵyn bir-birine sáikes kelmei jatady. Memlekettik zańdar aldymen sol eldiń óz tilinde daiyndalyp, sodan keiin ǵana qajet bolsa, orys tiline aýdarylýy tiisti», - dedi M. Baqtiiaruly.
Óz kezeginde Senat depýtaty Nurtóre Júsip senatorlardyń eskertýimen tolyqtai kelisetinin jetkizdi.
«Elimizdegi kez kelgen zańnyń sapasy birinshi kezekte durys bolýy kerek. Qabyldanǵan zań jumys isteýi tiis, ol úshin zańnyń tili jumys isteýi kerek. Aýdarma arqyly qabyldanǵan zańnyń júzege asýy, ómirde qoldanylýy óte qiyn. Sondyqtan kez kelgen zańdy qabyldaý kezinde memlekettik tildi qurmetteýdi ótiner edim», - dedi N. Júsip.
