QR Parlament Májilisiniń jalpy otyrysynda aýdan ortalyqtary men aýyldarda kópbalaly otbasylarǵa baspana salý máselesi kóterildi, dep habarlaidy QazAqparat tilshisi.
«Búginde baspana negizinen oblys ortalyqtarynda jáne iri qalalarda salynýda. Al aýdan ortalyqtarynda, onyń ishinde aýdandyq mańyzdaǵy qalalarda jańa úilerdiń qurylysy joqtyń qasy. Ókiletti organdardyń málimetinshe, baspanaǵa muqtaj 31725 kópbalaly otbasynyń arasynda 9461-i nemese 30 paiyzy aýdan ortalyqtarynda nemese aýyldy jerlerde turady. Osy oraida bul másele qalai sheshiledi?», - dep surady depýtat Quralai Qaraken.
Óz kezeginde QR Indýstriia jáne infraqurylymdyq damý vitse-ministri Qaiyrbek Óskenbaev 2019 jyldyń biýdjetinde qarastyrylǵan 50 mlrd teńgeniń 27,5 mlrd teńgesi jańa turǵyn úidi salýǵa qarastyrylǵanyn jetkizdi.
«22,5 mlrd teńge baspana alýǵa baǵyttalady, onyń ishinde kópbalaly analar turyp jatqan aýdan ortalyqtary men aýyldar qamtylǵan. Biz ákimdikterge qurylysqa jáne baspanany satyp alýǵa qarjyny bólemiz. Olar konkýrs jariialap, kezekte turǵandar úshin qajetti páterlerdi alady», - dep túsindirdi Q. Óskenbaev.
Osy turǵyda Parlament Májilisiniń tóraǵasy Nurlan Nyǵmatýlin aýyldy jerlerde satyp alýǵa bolatyn úilerdiń joq ekenin atap ótti.
«Qaiyrbek Aitbaiuly, aýyldarǵa baryp júrsiz ǵoi. Qazir aýylda qaibir daiyn úi bar? Aýylda turǵyn úi salýǵa daiyn qurylys kompaniialary bar ma? Ol jerlerde daiyn baspana joq. Atalyp ótkendei, baspanaǵa muqtaj kópbalaly otbasylardyń 30 paiyzy aýyldyq aýmaqtarda turyp jatyr», - dedi Májilis tóraǵasy.
Bul rette Qaiyrbek Óskenbaev aýdan ortalyqtarynda az qabatty úiler salynatynyn aitty.
«Aýdan ortalyqtarynda kópqabatty záýlim úilerdi salmaimyz. Biz 4-5 aida salynatyn az qabatty turǵyn úilerdi turǵyzamyz. Sondyqtan da biyl jergilikti atqarýshy organdarda osyndai úilerdi salýǵa ýaqyt jetkilikti bolady. Tiptik jobalardy daiyndadyq, olardyń barlyǵy saraptamadan ótti», - dedi vitse-ministr.
Budan buryn habarlanǵandai, jalpy otyrysta palata depýtattary «Qazaqstan Respýblikasynyń keibir zańnamalyq aktilerine turǵyn úi qatynastary máseleleri boiynsha ózgerister men tolyqtyrýlar engizý týraly» zań jobasyn maquldady.
Onyń aiasynda «Altyn alqa», «Kúmis alqa» alǵandar nemese buryn «Batyr ana», sondai-aq birinshi jáne ekinshi dárejeli «Ana dańqy» ataǵyn alǵan kópbalaly analar men kópbalaly otbasylar sanaty úshin turǵyn úi alýǵa jeke kezek engizý qarastyrylǵan.
