Atyraýlyq 27 jastaǵy kásipker Tamila Rozmetova Astanada tamshylap sýarý júiesine qosylǵan alma baǵyn salýdy josparlaýda. Alma baǵyn salý úshin jas kásipker Prezidentten elordada arnaiy oryn belgilep berýdi suraǵan bolatyn, dep habarlaidy QazAqparat tilshisi.
Astana qalasynda «Táýelsizdik urpaqtary» ataýymen ótip jatqan Jastar jylynyń ashylý saltanatynda kásipker, «Nur Otan» partiiasy men QHA múshesi Tamila Rozmetova óziniń kásibi týraly aityp berdi.
«Jastar jyly - biz úshin úlken múmkindik. Meniń jasym 27-de. Fermermin. «Saraishyq» fermasyn basqaryp otyrǵanyma 5 jyl boldy. Bul - Alpi eshkileriniń sútin óńdeitin kásiporyn. Bizdiń fermada myńǵa tarta eshki bar. Sút óniminiń 15 túrin shyǵaramyz. Meniń hobbiim - irimshik óndirý. Men irimshiktiń birneshe túrin jasap kelemin. Olardyń birin ózimniń týǵan jerimniń qurmetine «Atyraý irimshigi» dep atadym. Bul óte paidaly ári 100 paiyz sapaly ónim. Bizdiń ujymda 80-ge tarta qyzmetker bar. Olardyń 94 paiyzynyń jasy 36-ǵa deiingi jastar. Jas bolǵandyqtan, arman-tilekterimiz mol», - deidi Tamila Rozmetova.
Jas kásipker «Aýyl - el besigi» jobasy týraly aita kele bul bastama jastar úshin aitarlyqtai áleýmettik lift bola alatynyn atap ótti.
«Qazaqstan - almanyń tarihi Otany ekenin men sizdiń maqalańyzdan oqyp bildim. Biz qazirgi tańda Mahambet almasyn qaita jańǵyrtýdy qolǵa aldyq. Jastar jyly QHA janyndaǵy «Jańǵyrý joly» jastar qozǵalysy naqty jobalarǵa qoldaý bildirgimiz keledi. Osy kóktemde Astanada alma baǵyn salýdy josparlap otyrmyz. Biz qazirdiń ózinde osy baq úshin almanyń sýyqqa da, jelge de shydamdy 400 sortyn daiyndap qoidyq. Sonymen birge, alma baǵyn tolyǵymen tamshylatyp sýarý júiesine qosamyz. Sizden elordada alma baǵyna oryn belgilep berýińizdi suraimyn», - dedi jas kásipker.
Osyǵan orai Memleket basshysy alma baǵyna arnaiy oryn bólýdi Astana qalasynyń ákimi Baqyt Sultanovqa tapsyrdy.
Aita ketsek, Jastar jylynyń ashylýyna Úkimet músheleri, QR Parlamenti depýtattary, jergilikti atqarýshy organ basshylary, QR Prezidenti janyndaǵy Jastar saiasaty keńesiniń músheleri, «100 jańa esim» baiqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jiynǵa shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýi media salasynyń ókilderi, balalar úiiniń tárbielenýshileri men túlekteri, jas áskeri qyzmetshiler kelgen.
Eske sala ketsek, QR Prezidenti Nursultan Nazarbaev Qazaqstan halqyna biylǵy Joldaýynda 2019 jyldy Jastar jyly dep jariialaýdy usynǵan bolatyn.
Prezident óz sózinde jastardyń barlyq sanatyn qoldaýǵa arnalǵan sharalardy tolyq qamtityn áleýmettik satynyń aýqymdy platformasyn qalyptastyrý kerektigin aitqan bolatyn Al, arada bir aidan astam ýaqyt ótkende Elbasy Jarlyǵymen 2019 jyl Jastar jyly dep jariialandy.
.jpeg)