Atyraýlyq stýdentterdiń elge oralýyna sheteldik kásiporyn demeýshilik jasady, dep habarlaidy "Ult aqparat".
Keshe, 25 naýryzda Atyraý oblysynyń ákimi Mahambet Dosmuhambetovtiń tapsyrmasymen Varshavadan Qaraǵandy arqyly 33 stýdent Atyraýǵa oraldy. Olardy halyqaralyq áýejaida týǵan-týystary kútip aldy. Búgin, taǵy 25 stýdent Atyraý halyqaralyq áýejaiyna ushyp keledi.
Olar Varshavadan Qaraǵandyǵa oralǵan sátte koronavirýs infektsiiasyna jedel test tapsyrǵan. Sol qalada eki kún karantinde bolǵan. Test nátijesi olardyń indetke shaldyqpaǵanyn kórsetti.
«Basym kópshiligi – shetelde oqityn stýdentter. Olardyń birazy batys óńirlerinen, iaǵni, Atyraýdan - 27, Batys Qazaqstannan - 19, Aqtóbeden - 7, Mańǵystaý oblysynan 6 stýdent bar. Bári de – infektsiiadan aman. Stýdentterdi Atyraýǵa jetkizý úshin oblys ákimi Mahambet Dosmuhambetovtiń tapsyrmasymen «Teńizshevroil» JShS-niń basshylarymen jiyn ótkizip, atalǵan kompaniianyń áýe kemesin paidalaný jóninde sheshim qabyldadyq» - dedi Atyraý oblysy ákiminiń orynbasary Erjan Ábilhanov.
Onyń aitýynsha, endi TShO-nyń taǵy bir reisi keshe Aqtóbe jáne Batys Qazaqstan oblystarynyń stýdentterin Oral qalasyna jetkizedi.
«Teńizshevroil» JShS bas direktory Imer Bonner bizdiń bastamamyzdy qoldady. Ústemeaqy tóleý jóninde eshqandai másele týyndaǵan joq. Eki reistiń shyǵyny kompaniia esebinen tólendi. Barlyq stýdent tegin ushyp keldi» - dedi Erjan Ábilhanov.
Atyraýǵa oralǵan stýdentterdiń biriniń anasy Tatiana Mohnachevanyń qýanyshynda shek joq. Ol Polshadaǵy litseide oqityn ulyn qushaqtap, «Aman-esen oralýyńmen, qulynym!» dep kóz jasyn jasyra almady.
«Biz balalarymyzdyń aman-esen kelgenine óte qýanyshtymyz. Olardyń jaǵdaiy jaqsy. Kórsetken kómekteri úshin oblys ákimdigi men TShO kompaniiasyna alǵysymyz sheksiz» - dedi Tatiana Mohnacheva.
Barlyq stýdent Atyraý halyqaralyq áýejaiynda da jedel test tapsyrdy. Dene qyzýy ólshenip, saýalnama toltyrdy. Olar endi 14 kún úi karantininde bolyp, dárigerlerdiń qadaǵalýyna alynbaq. Bul – elimizdiń Densaýlyq saqtaý ministrligi qoiǵan talap.
