Reseige baryp naýqas balasyna ota jasatamyz degen jeleýmen Aýǵan eline jihadqa attanbaq bolǵan otbasy Qazaqstannyń áýejaiynda ustaldy.
Bul oqiǵa Atyraý oblysynda bolǵan edi.
Keiin adasqan otbasynyń otaǵasymen teolog, dintanýshy, Nur-Múbárak Egipet Islam mádenieti ýniversitetiniń doktoranty, respýblikalyq aqparattyq nasihat tobynyń múshesi Serikjan Enshibai túrmede kezdesti.
Arnaiy qyzmet mamandary bul otbasynyń shetel aspaq bolǵan nietin bilip qoiǵan.
Otbasy páterin satyp, qujat ázirlep, qaryzǵa kóp somada aqsha izdei bastaǵan.
Jaqyndaryna Reseige baryp naýqas balasyna ota jasatamyz dep syltaý aitqan.
Beibit elinen bezip, Vaziristannan baqyt izdegen otbasyny áýejaida turǵan jerinen UQK qyzmetkerleri ustady.
Keiin otaǵasyna terrorizm jáne ekstremizm babymen qylmystyq is qozǵalyp, túrmege jabyldy.
«Men onymen túrmede otyrǵanda jolyqtym. Oqiǵasyn óz aýzynan estidim. Bul jigit te radikal salafizm aǵymyna ergen. Keiin 6 ai boiy júrgizilgen ońaltý jumystarynan soń jaimen óziniń raiynan qaita bastady. Qandai qatelik jasadyń desem, meshitke jolamaǵanym – qatelik boldy deidi. Olar meshitke kelmeidi, meshitte memlekettiń adamdary bar dep sanaidy. Shariǵatpen istemeidi. Memlekettik saiasatty kápir memlekettiń saiasaty dep sanaidy. Meshitke múlde jolamaidy. Bulardyń kósemi - Said Býriatskii bolǵan. Olar Resei arqyly Aýǵanstanǵa, odan qaqtyǵys ordasy Vaziristanǵa ketpek bolǵan. Negizi Atyraýdan Vaziristanǵa kóp adam ketti. Bizdiń túrmedegi keiipkerimiz de Atyraýdyń Juldyz eldi mekeninen. Baryp kelgender boldy. Kelgenderdiń kópshiligi sottaldy. Ketýge oqtalǵandar da qylmystyq is jasady dep sanalady. Shet memlekette bolyp jatqan qaqtyǵystarǵa qatysý zańmen qýdalanady. Al áielderge jeńildik jasaldy. Sebebi olar kúieýleriniń yqpalymen, aitaǵymen ketti. Bul jigittiń de áieliniń arqasynda kiltin taptyq. Ár adamǵa ózinshe áser etýge tyrysamyz. Kúieýińiz áli raiynan qaitpai otyr dep áieline aittyq. Sottalǵandar otbasymen birneshe ret kezdesedi. Sol kezdesýge baryp júrip áieli de onyń kózqarasyna yqpal etti», - dedi Serikjan Enshibai.
Sanasy ýlanǵan azamattarmen jumys tek qana teologtyń kezdesýimen bitpeitini anyq. Adamdy miyna sińip qalǵan kózqarastan ainytýǵa ailar da jyldar da jetpeýi múmkin.
Ońaltýǵa kónbeitinderi de bar.
Bul jumysqa tek qana memleket emes, psiholog, týǵan týystary, ainalasy, baýyrlary, tipti BAQ, qoǵam bolyp atsalysýy tiis.
Terrorizm men ekstremizmniń túbirine balta shabýǵa jumylyp eńbek etý kerek.
