Atyraý turǵyny Nurgúl Aqtileýova úsh balanyń anasy, II top múgedegi - tabysynan 90 teńge asyp ketkeni úshin ataýly áleýmettik kómekten qaǵylǵan.
32 jastaǵy Nurgúl Aqtileýova – memlekettik baǵdarlama aiasynda Atyraý qalasyndaǵy Nursaia móltekaýdanynda úi jaldap turady. Kishkentai kezinde tórtinshi qabattan qulap qatty jaraqattanǵan Nurgúldiń densaýlyǵy óse kele syr berip, biyl tipten júre almai qalǵan. Sol sebepten tek naýryzǵa deiin jumys istep, aýrýy shydatpaǵannan soń Nur-Sultanǵa baryp, janbasyna ota jasatqan, dep jazdy Sputnik agenttigi "Aq jaiyq" basylymyna silteme jasap.
Maýsym jáne tamyz aralyǵynda Nurgúl ataýly áleýmettik kómekti alyp turǵan. Al qyrkúiekten beri kómekti tólemei qoidy.
"Qyrkúiekte jumys ornymnan maǵan 142 myń teńge kóleminde eńbekke jaramsyzdyǵym úshin ótemaqy tóledi. Múgedektigime bailanysty 89 myń teńge zeinetaqy aldym. Aliment tólemei júrgen joldasym 50 myń teńge tóledi. Osynyń bárin eseptep kelgende, belgili mejeden 90 teńge asyp ketken. Al bul ataýly áleýmettik kómek tóleýdi toqtatýǵa negiz boldy. Balalardy mektepke daiyndaý, azyq-túlik, páteraqy men turmystyq shyǵyndar bar - bári az aqsha emes. Endi qystygúni áleýmettik kómeksiz otyrmyz", - deidi Nurgúl Aqtileýova.
"Aq jaiyq" basylymyna qalalyq jumyspen qamtý, áleýmettik baǵdarlamalar jáne azamattyq hal aktilerin tirkeý bóliminen mynadai jaýap keldi:
"Ahtleýova Nýrgýl Abaevna Atyraý qalasynda jetimder sanatymen alǵan páterde 2010, 2014,2015 jyly týǵan balalarymen turady. 10.08.2021 jyly 2 top múgedektigin alǵan. Joldasymen ajyrasqan. 2021 jyldyń II toqsanyna 22743 teńge, III toqsanyna 121794 teńge ataýly áleýmettik kómek taǵaiyndalyp, tólengen. Al otbasynyń 3 toqsandaǵy tabysy, iaǵni, shilde aiyna eńbekaqysy 43755 teńge, tamyz aiyna eńbekaqy 142145 teńge, qyrkúiek aiyna múgedektik járdemaqysy 89729 teńge jáne aliment 50000 teńge. Barlyǵy 325629 teńgeni úsh aiǵa tórt adamǵa bólgende 27135 teńgege teń. Ol kedeilik sheginen (27045 tg) joǵary bolǵandyqtan 4 toqsanǵa ataýly áleýmettik kómek taǵaiyndaýǵa negiz joq. Konstitýtsiia kúnine tamyz aiynda 50000 teńge jáne mamyr aiynda arnaiy komissiia sheshimimen 50000 teńge birjolǵy áleýmettik kómek kórsetilgen. Sonymen qatar, jeltoqsan aiyndaǵy “Halyq” qaiyrymdylyq qorynan beriletin azyq- túlik tizimine qosyldy", - delingen jaýapta.
Vedomstvonyń málimetinshe, barlyq kórsetiletin kómekter Qazaqstan Respýblikasynyń 2001 jylǵy 17 shildedegi "Memlekettik ataýly áleýmettik kómek týraly» Zańyna sáikes taǵaiyndalady. Atalǵan Zańnyń 7 babynyń 1 tarmaǵyna sáikes ataýly áleýmettik kómek mólsheri otbasynyń jan basyna shaqqandaǵy ortasha kirisi men oblysta belgilengen kedeilik shegi arasyndaǵy aiyrma túrinde esepteledi.
Sondyqtan otbasynyń jan basyna shaqqandaǵy kirisi kedeilik sheginen joǵary bolǵan jaǵdaida ataýly áleýmettik kómek taǵaiyndaýǵa negiz joq.
