Atyraýdyń jastar teatry halyqaralyq festivaldiń bas júldesin ielendi, dep habarlaidy "Ult aqparat".
Mahambet atyndaǵy akademiialyq qazaq drama teatrynyń ártisteri Gúlnur Qaiyrlieva men Ámirjan Nurlanuly jastar teatryn qurǵan edi. Olar trýppa múshelerin stýdentter men joǵary synyp oqýshylarynyń arasynan tańdaǵan.
«Kasting kezinde akterlik ónerge beiim jastardyń kóp ekenin baiqadyq. Alǵashqy spektakldi Jaiyq jaǵalaýynda, qalalyq saiabaqtarda qoidyq. Búgingi jastardyń kóńilinen shyǵatyn, aýditoriiasyna laiyq taqyryptardy repertýarǵa engizýge tyrystyq» -deidi teatr jetekshisi Ámirjan Nurlanuly.
Jaqynda jastardyń óner ujymy Kerch qalasynda udaiy ótetin «Bosporskie agony» halyqaralyq teatr festivaline attanǵan edi. Bul festivalge atyraýlyq jastar aǵylshyn jazýshysy Bernard Shoýdyń «Tsezar jáne Kleopatra» pesasynyń jelisimen «Kleopatra» dramasynyń premerasyn usyndy. Bas rejisseri – Muqanǵali Tomanov.
«Bul – karantin kezindegi alǵashqy gastrol. Spektakl premerasy ózge eldiń sahnasynda alǵash ret usynyldy» - deidi teatr direktorynyń orynbasary Nurgúl Qumarqyzy.
Onyń aitýynsha, biyl HHIII ret ótken halyqaralyq festivalde 11 teatr baq synaǵan. Solardyń arasynan atyraýlyq jastar teatry eki júldeni ielendi. Festivaldiń bas júldesi – «Úzdik spektakl» atalymy munaily óńirdiń jas órenderi usynǵan «Kleopatra» qoiylymyna berildi. Sondai-aq, Kleopatrany somdaǵan atyraýlyq jas akter Ǵaini Kýkatova «Eń úzdik áiel róli» atalymyn ielendi.
