Jaiyq ózenindegi balyqtardyń jappai qyrylý sebepterin anyqtaý maqsatynda tergeý júrip jatyr.
«Qazirgi tańda óńirde vedomstvoaralyq komissiia balyqtyń qyrylý sebepterin anyqtaýǵa kirisip ketti. Onymen qosa, qyrylǵan balyqty jinaý jumysy júrip jatyr. Osy ýaqytqa deiin 5 tonna óli balyq jinaldy», - dep málim etti QR aýyl sharýashylyǵy ministrligi orman sharýashylyǵy jáne janýarlar álemin qorǵaý komitetiniń baspasóz qyzmeti.
Komitet málimetinshe, ózen sýynan ammiak tabyldy degen aqparat jalǵan. Negizi ammiak sýdan emes, balyqtan tabylǵan.
Eske sala keteiik, Jaiyq ózenindegi balyqtardyń jappai qyrylý sebebin anyqtaý úshin ózenge sý aǵyzatyn 4 kásiporyn tekserilip jatyr. Atyraý oblystyq ekologiia departamenti bas memlekettik inspektory Qairatqali Hairýllanyń aitýynsha, mamandar «Atyraý Sý Arnasy» MKK, «Atyraý TETs» AQ, «Bekire balyǵyn ósiretin Oral-Atyraý zaýyty» men «Atyraý bekire balyǵy zaýytyn» tekserýde.
Budan buryn Atyraýda Jaiyq ózenindegi balyqtardyń neden qyrylǵany aitylǵan bolatyn.
«Jaiyq ózenindegi ólgen balyqtyń synamasyn zerthanada taldaýdan ótkizgende, odan ammiak tabyldy. Qazirgi tańda bul zattyń ózenge qalai túskeni anyqtalyp jatyr», - dep habarlady veterinarlyq baqylaý jáne qadaǵalaý komitetiniń aýmaqtyq inspektsiiasynyń basshysy Ǵalymbek Bisenǵaliev.
Ult aqparat
