Foto: AqJaiyq
Atyraýda jeti jasar qyzdyń qazasyna qatysty daýly is jańa betburys aldy. Buǵan deiin kináli dep tanylyp, sottalǵan músinshige qatysty úkim joiyldy, dep habarlaidy Ult.kz.
Qaiǵyly oqiǵa 2024 jyldyń maýsym aiynda qaladaǵy Jeńis saiabaǵynda bolǵan. Jańbyrdan qorǵanǵan adamdardyń ústine tas eskertkish qulap, jeti jasar qyz ben onyń ákesi aýyr jaraqat aldy. Ákesi aman qalǵanymen, qyz aýrýhanada kóz jumdy.
Osy oqiǵadan keiin eskertkishti jasaǵan músinshi kináli dep tanylyp, 18 aiǵa bas bostandyǵynan aiyrylǵan edi. Ol bir jarym jylǵa jýyq ýaqytyn qamaýda ótkizdi. Alaida qorǵaýshy tarap úkimmen kelispei, isti sońyna deiin daýlaýdy jalǵastyrdy.
Músinshiniń advokaty Talǵat Dáýletov eskertkishtiń qulaýyna basty sebep – tiisti baqylaýdyń bolmaýy ekenin alǵa tartty. Onyń aitýynsha, eskertkish ondaǵan jyl boiy qaraýsyz qalǵan.
Apelliatsiialyq sot bastapqyda úkimdi ózgerissiz qaldyrǵanymen, is kassatsiialyq satyǵa deiin jetti. Nátijesinde, Astanadaǵy kassatsiialyq sot músinshiniń úkimin joiyp, isti qaita qaraýǵa jiberdi.
Qylmystyq ister jónindegi kassatsiialyq sot sýdiasy Azamat Tilepov bul iste ákimdik qyzmetkerleriniń de jaýapkershiligi qaralýy tiis ekenin atap ótti. Sebebi eskertkishti ornatý, onyń qaýipsizdigin qamtamasyz etý jáne tiisti baqylaý júrgizý jergilikti atqarýshy organdardyń mindetine jatady.
Qazirgi tańda is qaita qaralýda. Al músinshige qatysty túpkilikti sheshim jańa sot protsesiniń qorytyndysy boiynsha qabyldanady.
