Búgin Úkimet otyrysynda Premer-Ministr Baqytjan Saǵyntaev Atyraý oblysynyń ákimi Nurlan Noǵaevqa óńirdegi balabaqsha qurylystary barysyn jeke baqylaýǵa alýdy tapsyrdy, - dep habarlaidy Ult.kz tilshisi QazAqparat agenttigine silteme jasap.
«2004 jyldan beri sizde birde-bir balabaqsha berilmepti, buǵan qosa, 2 mekteptiń qurylysy aiaqtalmaǵan. Nege?», - dep surady Úkimet basshysy N.Noǵaevtan.
Bul rette oblys basshysy Atyraý óńirinde 3 problemaly másele bar ekendigin moiyndady. «Onyń biri «Nursaia» shaǵynaýdanyndaǵy mektep. Biz ony kelesi jyly paidalanýǵa beremiz. 2014 jyldan beri kele jatqan ekinshi másele - bul jumystardyń sapasyz júrgizilýine bailanysty balabaqshalardyń paidalanýǵa berilmeýi. Biz bul nysandy da taiaý ýaqytta berýdi josparlap otyrmyz. Sonymen qatar Maqat aýdanyndaǵy mektep qurylysyn da osy jyly aiaqtaimyz. Turǵyn úi qurylysy boiynsha injenerlik-kommýnikatsiialyq infraqurylym júrgizildi. Barlyq qarjy igerildi», - dedi N.Noǵaev.
Munan bólek, ol qazirgi ýaqytta oblysta 44 kópqabatty jáne 15 bir qabatty turǵyn úidiń qurylysy josparǵa sáikes júrgizilip jatqanyn aitty.
Osy rette B.Saǵyntaev oblys ákimine bul máselelerdi sheshýdi ári óńirdegi balabaqshalar qurylysyn óz baqylaýyna alýdy qatań tapsyrdy.
«Bir balabaqshanyń qurylysy úsh jyl boiy nelikten aiaqtalmai otyr? Nege baqylaý joq. Sizge osyǵan nazar aýdarýyńyzdy ótinemin», - dedi Úkimet basshysy.
.jpeg)