Atyraý oblysyndaǵy Primorsk kanalynda balyq qyrylýyna bailanysty Qazgidromet mamandary «Aqjaiyq» tabiǵi rezervatynyń aýmaǵynda jospardan tys úshinshi ret sý synamasyn aldy, dep habarlaidy "Ult aqparat" «Qazgidromet» baspasóz qyzmetine silteme jasap.
«27 sáýirde Primorsk kanalynda balyqtyń qyrylýy taǵy qaita anyqtalǵandyqtan QR Ekologiia, geologiia jáne tabiǵi resýrstar ministrligi «Qazgidromet» RMK Atyraý oblysy boiynsha filialynyń qyzmetkerleri jospardan tys úshinshi ret birneshe núkteden synama aldy. «Aqjaiyq» rezervaty beketine jaqyn kópir mańynda, «Aqjaiyq» beketindegi aǵystany 6,5 km tómen tusta tekserý úshin sý jinaldy», delingen habarlamada.
Gidrologiialyq derek boiynsha 26-27 sáýir aralyǵynda Jaiyq ózeniniń deńgeii 25 sáýirde sý deńgeii kóterilýinen keiin 5-17 sm tómendedi.
«Sý sapasyn taldaý basty iondar, biogendi, organikalyq jáne organikalyq emes zattar, aýyr metaldar sekildi 39 kórsetkish boiynsha júrgiziledi. Taldaý nátijesi boiynsha sý lailanǵan, sýdyń temperatýrasy 15-17ºS, sýtegi kórsetkishi - 6,97-7,48, erigen ottegi - 7,1-7,2 mg/dm3, ottegi qanyǵýy -71,7 – 73,8 %, móldirligi - 5,5-7 sm, túsi - 19,5-20 gradýs. Sýdan bóten iis tabylmady. Primorsk kanalynda alynǵan synamada temir mólsheri sý sapasynyń biryńǵai jiktemesiniń shekti normasynan 1,7 ese asyp ketken (0,5 mg/dm3) (1,7 ese asyp ketý). Al bql kórsetkish «Aqjaiyq» beketinde 6 km tómen jerde norma sheginde tirkeldi», delingen habarlamada.
1 mamyrda 5 táýlik ishinde shyǵatyn «ottegini biohimiialyq tutyný (5)» taldaý nátijesi jariialanady.
Eske sala ketsek, 21 sáýirde Primorsk kanalynyń Jaiyqqa qarai aǵatyn salasynda balyq qyryldy. Orman sharýashylyǵy jáne janýarlar dúniesi komitetiniń baspasóz hatshysy Sáken Dildahmettiń aitýynsha, sol tustan 3,7 tonnaóli balyq jinalyp alynǵan.
