Patrýldik politsiia batalony jol-kólik oqiǵasy saldarynan arbaǵa tańylǵan jandarmen birge erekshe formattaǵy túsindirý jumystaryn júrgizdi, dep habarlaidy Ult.kz.
Aktsiianyń basty maqsaty — turǵyndarǵa jolda abai bolýdyń mańyzdylyǵyn túsindirý jáne ómirdiń bir sátte ózgerip ketýi múmkin ekenin kórsetý. Politsiia qyzmetkerleri men aktsiia qatysýshylary qala kóshelerinde jaiaý júrginshiler men júrgizýshilerge jol qaýipsizdigi erejelerin saqtaý qajettigin eske saldy.
"Búginde Atyraýda 400-den astam adam jol apatynan zardap shekken. Ózimiz de osy jaǵdaidy bastan ótkergen soń, jol apatynyń saldary qandai aýyr bolatynyn jaqsy túsinemiz. Jol qatelikti keshirmeidi. Sondyqtan jolda árdaiym abai bolyńyzdar", – dedi qoǵam belsendisi Esbolat Balabaev.
Shara barysynda qala turǵyndary arbaǵa tańylǵan jandardyń shynaiy oqiǵalaryn tyńdap, tereń áser alǵandaryn jetkizdi. Bul úndeý árbir adamdy jolda jaýapkershilikpen júrip, qaýipsizdik erejelerin qatań saqtaýǵa shaqyrdy.
