Atyraýda radikal dini toptyń músheleri mektep oqýshylarymen neke qiyp alǵan da, kóp uzamai talaq aityp, tastap ketken, - dep habaralidy atr.kz.
Basylymnyń jazýynsha, 1978 jyly týǵan atyraýlyq óziniń 16 jastaǵy qyzyn otyzdan asqan er adamǵa turmysqa bergen. Qazir qyz bala osynyń saldarynan keshki mektepte oqýǵa májbúr eken. Buǵan bei-jai qarai almaǵan kórshileri quqyq qorǵaý organdaryna da habarlasqanymen, budan esh nátije shyqpaǵan kórinedi.
Sonymen qatar, Almaty qalasynyń 30 jastaǵy turǵyny "VKontakte" jelisi arqyly 9-synyp oqýshysymen tanysyp, onyń dinge qyzyǵýshylyǵyn óz maqsatynda paidalanǵan. Biraz ýaqyt ótken soń er adam Atyraýǵa baryp, kámeletke tolmaǵan qyzben nekelesken. Alaida bul jaittan qyzdyń ata-anasy beihabar bolǵan. Osydan keiin qyz bala mektepke shyǵyp ketip otyrǵanymen sabaqqa qatyspaǵan. Oqýshy qyz bul kezde qonaqúige baryp, almatylyq er adammen ýaqytyn ótkizip júrgen eken. Birneshe kúnnen keiin muǵalimder qyzdyń sabaqqa kelmei júrgenin aitqan kezde bul jaittyń beti ashylǵan. Degenmen er adam shý shyǵa salysymen, "talaq" aityp, Almatyǵa ketip qalǵan.
Bul jaittyń úlken daýǵa ulasyp ketýinen qoryqqan ata-anasy qylmystyq is qozǵaýdan bas tartqan. Bul oqiǵalardyń qashan bolǵanyn basylym atamady.
Bul jaǵdailarǵa bailanysty Atyraý oblysy Din isteri basqarmasynyń basshysy Qairolla Kóshqaliev pikir bildirgen.
"Bul jerde "qyz óz erkimen kúieýge tidi" degen aqparattar da tarap jatyr. Shyndyǵynda, olai emes. Sebebi, salafizm aǵymynyń ustanýshylary qyzdy kishkentaiynan "16 jasta kúieýge shyǵatyn kez" dep tárbieleidi. Sosyn "ákege qarsy shyǵýǵa bolmaidy" degen kózqarasy qalyptasqan qyz bala "kelispeý kúná eken" degen oimen basyn iip kete barady. Al, ekinshi jaǵdaiǵa qatysty aitar bolsaq, munda oqýshy qyz ózinen 14 jas úlken jigittiń oiynshyǵyna ainalyp otyr. Bul jaǵdaiǵa qatysty mektep oqýshysymen psihologtar jáne "Shapaǵat" ortalyǵynyń teologtary jumys jasady. Nátijesinde ekinshi oqiǵa keiipkeri kózqarasyn ózgertip, Hanafi mázhabyn qabyldady. Bul jaǵdaiǵa qyz balalardyń jeke tragediiasy dep qaraýǵa bolmaidy. Sebebi, adasýshylyqtyń sońy otbasy qundylyqtarynyń ábden kúireýine aparatynyn kórsetti. Destrýktivti kózqarastaǵy adamdar uiat, ar, balasyna degen ákelik mahabbat siiaqty sezimderden de ada keledi", - dep túsindirdi ol.
