Atyraýda turaqtandyrý qory 605 tonna kókónispen qamtyldy, dep habarlaidy "Ult aqparat".
Óńirlik kommýnikatsiialar qyzmetiniń málimetinshe, Atyraýda áleýmettik mańyzy bar azyq-túlik taýarlary baǵasynyń ósýin tejeý jáne turaqtandyrý qolǵa alynǵan.
Qazir «Atyraý» áleýmettik-kásipkerlik korporatsiiasy» AQ turaqtandyrý qory 605 tonna kókónispen qamtylǵan.
Onyń ishinde 361 tonna kartop, 80 tonna piiaz, 50 tonna sábiz, 114 tonna qyryqqabat bar.
«Biyl «Feliks» sharýa qojalyǵymen 605 tonna kókónis jetkizýge forvardtyq kelisimshart jasaǵan edik. Soǵan sáikes jetkizilgen ónim sharýa qojalyǵynyń jeke qoimasynda saqtalady. Al turaqtandyrý qory arqyly satylatyn kókónis baǵasy ótken jylǵy deńgeide qalady», - deidi «Atyraý» ÁKK» AQ memlekettik baǵdarlamalardy iske asyrý jáne MJÁ jobalaryn saraptaý departamentiniń basshysy Gúlmira Meńdiǵalieva.
Onyń aitýynsha, biyl turaqtandyrý qoryna satyp alynǵan ónim kólemi burynǵydan azaiǵan.
«Sońǵy jyldary atyraýlyqtardyń kókónisti tutyný statistikasyna, aýyl sharýashylyǵy ónimderin satý deńgeii taldandy. Sodan baiqaǵanymyz, kókónis tutynýda tapshylyq bolǵan joq. Baǵa turaqtylyǵy saqtaldy. Osyndai taldaýdan soń turaqtandyrý qoryna 605 tonna ónim jetkilikti bolady degen qorytyndy jasadyq», - deidi G. Meńdiǵalieva.
Turaqtandyrý qoryndaǵy kókónister biylǵy jeltoqsannan bastap 4 iri saýda núktesinde bekitilgen baǵamen satyla bastaidy.
