Atyraý qalalyq soty alty adamdy Qazaqstanda tyiym salynǵan "Tabliǵi Jamaǵat" dini uiymynyń qyzmetine aralasty dep aiyptap, eki jyldan úsh jylǵa deiingi merzimderge sottady.
Qalalyq №2 sottyń málimetinshe, Almaty, Atyraý jáne Shyǵys Qazaqstan oblystarynyń alty turǵyny 2016 jyly Mańǵystaý jáne Almaty oblystarynda, odan burynyraqta Almatyda "Tabliǵi Jamaǵat" uiymynyń ideialaryn taratty dep aiyptalǵan. Sot materialdary boiynsha, sottalýshylar osy uiymnyń Úndistan, Pákistan jáne Bangladeshtegi oqý ortalyqtarynda bilim alǵan.
"Uiymnyń eń belsendi múshesine úsh jyl, qalǵan beseýine eki jyldan jaza kesildi" dep habarlady sottyń baspasóz qyzmeti. Sot sheshimimen olarǵa eki jyldan úsh jylǵa deiin dini qyzmetpen ainalysýyna tyiym salyndy. Sottalýshylar jazasyn jalpy rejimdegi koloniiada ótemek.
Sot aiyptalýshylar ustalǵan kezde olardan orys jáne qyrǵyz tilderindegi tyiym salynǵan kitaptar tabylǵanyn ǵana habarlap, aty-jónderin aitpady.
Qazaqstanda "Tabliǵi Jamaǵat" uiymy 2013 jyly ekstremistik dep tanylyp, qyzmetine tyiym salynǵan. Biliktiń uiǵarymynsha, "Tabliǵi Jamaǵat" Ortalyq Aziiada islam halifatyn qurýdy kózdeidi.
Qazaqstanda 2013 jyldan beri bul uiymnyń qyzmetine aralasty degen aiyppen ondaǵan adam sottaldy.
