Atyraý oblysynda gaz jelisine qatysty monopoliiaǵa qarsy tergeý bastaldy, dep habarlaidy QazAqparat.
«Qazaqstan janarmai qaýymdastyǵy 1» birlestiginiń ótinishi negizinde Básekelestikti qorǵaý jáne damytý agenttiginiń Atyraý oblysy boiynsha departamenti monopoliialyq ústem jaǵdaidy teris paidalaný, monopoliialyq joǵary baǵa belgileý belgileri boiynsha «Suiytylǵan munai gazyn saqtaý parki» JShS gaz jelisi uiymyna qatysty tergeý bastady.
Básekelestiktiń jai-kúiin taldaý nátijesi boiynsha «Suiytylǵan munai gazyn saqtaý parki» JShS Atyraý oblysynyń geografiialyq shekarasynda suiytylǵan munai gazyn qaitalama-kóterme saýdada ótkizý naryǵynda ústem jaǵdaiǵa ie ekendigi anyqtaldy.
Sonymen qatar, Atyraý oblysy boiynsha ekonomikalyq tergeý departamenti atalǵan gaz jelisi uiymynyń qyzmetine tekserý júrgizdi jáne oǵan óńirdiń monopoliiaǵa qarsy departamentiniń mamany qatysty.
Tekserý nátijesi boiynsha 2019-2021 jyldary monopoliialyq joǵary baǵalardy belgileýge qatysty monopoliialyq jaǵdaidy teris paidalaný belgileri anyqtaldy.
Tekserý negizinde Atyraý oblysy boiynsha ekonomikalyq tergeý departamenti «Suiytylǵan munai gazyn saqtaý parki» JShS-ne qatysty qylmystyq is qozǵady, osyǵan sáikes memleket biýdjetine monopoliialyq kiristi alý boiynsha jumys júrgizilip jatyr.
Sonymen qatar, monopoliiaǵa qarsy departamenti «Suiytylǵan munai gazyn saqtaý parki» JShS-ne qatysty tergeýdi jalǵastyryp jatyr.
Óitkeni tekserý 2017-2021 jyldar aralyǵy boiynsha júrgiziledi.
Suiytylǵan munai gazyn kóterme saýdada ótkizý kezinde monopoliialyq joǵary baǵa belgileý faktileri anyqtalǵan jaǵdaida Qazaqstan zańnamasyna sáikes «Suiytylǵan munai gazyn saqtaý parki» JShS-ne qatysty tiisti sharalar qabyldanady.
