Atyraýda «Saraishyq» ataýymen ádebi-mádeni, tarihi-tanymdyq jýrnal jaryqqa shyqty, dep habarlaidy "Ult aqparat".
«Atyraý-Aqparat» JShS direktory Ysqaq Egemberdievtiń aitýynsha, jańa basylym oblys ákimi Mahambet Dosmuhambetovtiń qoldaýymen jaryq kórdi. «Saraishyq» – Atyraýdaǵy ádebi-mádeni, tarihi-tanymdyq baǵyttaǵy tuńǵysh basylym. «Atyraý-Aqparat» mediaholdingi janynan aiyna bir ret shyǵady. Alǵashqy nómiri 500 danamen shyqty. Kelesi jyldan bastap 2000 danamen tarala bastaidy.
«Jýrnaldyń «Saraishyq» atalýynyń ózindik simvolikalyq maǵynasy bar. Kezinde órkeniettiń bastaýy bolǵan bul shahar Uly Jibek joly boiyndaǵy ulttyq tarihymyz ben mádenietimizdiń máiegine, rýhaniiatymyzdyń ǵajaiyp oshaǵyna ainalǵan. Sol sebepten, shejireli shahar ataýymen ulttyq sanany jańǵyrtatyn ádebi-mádeni, tarihi-tanymdyq basylymdy shyǵarýdy jón kórdik» - deidi Ysqaq Egemberdiev.
Onyń aitýynsha, basylymnyń aqyldastar alqasynda aqyn, Qazaqstan Jazýshylar Odaǵynyń tóraǵasy Ulyqbek Esdáýlet, jazýshy, Memlekettik syilyqtyń iegeri Dýlat Isabekov, aqyn, halyqaralyq «Alash» ádebi syilyǵynyń laýreaty Ǵalym Jailybai, kompozitor, jazýshy, óner zertteýshisi Ilia Jaqanov, ǵalym, filologiia ǵylymdarynyń doktory Ǵarifolla Ánes sekildi qazaqtyń kórnekti qalamgerleri men ǵalymdary bar.
«Jýrnaldyń betashary Tuńǵysh Prezident – Elbasy N.Nazarbaevtyń, Memleket basshysy Q.Toqaevtyń ult rýhaniiaty týraly oramdy oilarymen ashyldy. Atyraý oblysynyń ákimi M.Dosmuhambetov jańa basylymǵa aqjoltai tilegin arnady. Aqyn Ǵ.Jailybaidyń álemdi dúr silkindirgen pandemiia týraly shyǵarmashylyq izdenisten týǵan «?» (Suraq belgisi) óleńder toptamasy, jazýshy Z.Jumanovanyń ómir shyndyǵyn shynaiy sýrettegen prozalyq shyǵarmalary, Abaidyń 175 jyldyǵyna orai jariialanǵan jazýshy, abaitanýshy M.Myrzahmetulynyń «Abaidyń Ál-Farabidi tanýy», jazýshy Q.Júsiptiń «Jumeken balladalary» degen taqyryptaǵy zertteý maqalalary, jazýshy S.Dúisenbievtiń «Japyraqtar da jylaidy» áńgimesi, ádebiet synshysy A.Keńshilikulynyń «Taǵdyrmen betpe-bet» taqyrybyndaǵy zertteý maqalasy, sýretker R.Seisenbaevtyń shetel klassikteriniń shyǵarmalaryna taldaý jasaǵan «Qudai táýbesine túsken kún» atty zertteý maqalasy, túrkistandyq ǵalym, sazger B.Serdáliniń «Túrkistan men Saraishyq» tarihy taǵdyrlas, tamyrlas» dep atalatyn qos qalanyń qazaq órkenietinde alar orny týraly tarihi tolǵanysy jariialandy. Sondai-aq, jazýshylar S.Latieva men M.Táj-Murat shyǵarmashylaryna oryn berildi» - deidi «Atyraý-Aqparat» JShS direktory Ysqaq Egemberdiev.
Jýrnaldyń alǵashqy nómirin tanystyrý rásimine oblys basshylyǵy, jergilikti jýrnalister men ǵalymdar, sondai-aq, KSRO jáne Qazaqstan Respýblikasy Memlekettik syilyqtarynyń laýreaty, Qazaqstannyń Eńbek Eri, teatr jáne kino akteri Asanáli Áshimov, Memlekettik syilyqtyń laýreaty, Qazaqstannyń halyq artisi, ánshi-kompozitor Altynbek Qorazbaev, respýblikalyq aityskerler jáne jyrshy-termeshiler Odaǵynyń basshysy, Qazaqstannyń eńbek sińirgen qairatkeri, aqyn Júrsin Erman, halyqaralyq «Alash» ádebi syilyǵynyń laýreaty, «Juldyz» jýrnalynyń bas redaktory, aqyn Ǵalym Jailybai, aqyn Svetqali Nurjanov, halyqaralyq «Alash» ádebi syilyǵynyń laýreaty, «Ana tili» gazetiniń redaktory, aqyn Janarbek Áshimjan, Batys Qazaqstandaǵy Qadyr Myrza-Áli atyndaǵy óner ortalyǵynyń direktory, aqyn Baýyrjan Haliolla, Qazaqstan Jazýshylar Odaǵy Nur-Sultan filialy direktory, aqyn Dáýletkerei Kápuly sekildi ult ziialylary qatysty.
