Atyraýda PTR test nátijeleri keshiktirilip jatyr. Onyń sebebin oblystyq densaýlyq saqtaý basqarmasy basshysynyń orynbasary Gúlnafis Tańbaeva túsindirip berdi, dep habarlaidy QazAqparat.
Gúlnafis Tańbaevanyń málim etýinshe, naýryz aiynan beri COVID-19 infektsiiasyn anyqtaý úshin aimaqta 20 238-nan asa test synamasy alynǵan.
«Búginge deiin Atyraý oblysyna 29 620 PTR test alyndy. Koronavirýs infektsiiasyn anyqtaý úshin 20 238 ret test jasaldy. Qazirgi ýaqytta testileý nátijesiniń merzimi keshiktirilip jatqany týraly shaǵymdar kóptep túsýde. Osy oraida, azamattarǵa zerthanalarda alynǵan barlyq synamalardy óńdeýge ýaqyttyń tapshy ekenin aitqym keledi. Mamandar táýlik boiy jumys isteýde. Ókinishke orai, Ulttyq saraptama ortalyǵy qyzmetkerleriniń 90 paiyzy koronavirýs infektsiiasyn juqtyryp, qazir olar tiisti em qabyldaýda. Barlyǵynyń da otbasy, qart ata-anasy, týystary bar. Sondyqtan, turǵyndardan bolyp jatqan jaǵdailarǵa túsinistikpen qaraýyn suraimyn», - dedi Gúlnafis Tańbaeva.
Onyń aitýynsha, keshe TShO kompaniiasy men oblystyq densaýlyq saqtaý basqarmasy PTR apparatyn Kaspii meditsinalyq jeke klinikasynyń balansyna berý týraly kelisim jasasty. Zerthananyń tolyqqandy jumys isteýi úshin qajetti jaǵdailardyń barlyǵy qarastyrylǵannan keiin, jýyq arada emhanadan koronavirýsqa test tapsyryp, nátijesin alýǵa bolady. Al, qazirgi ýaqytta PTR synamalaryn óńdeýmen «Invivo» meditsinalyq zerthanasy ainalysyp jatyr.
