اتىراۋدا پتر تەست نەتيجەلەرٸ كەشٸكتٸرٸلٸپ جاتىر. ونىڭ سەبەبٸن وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى گٷلنافيس تاڭباەۆا تٷسٸندٸرٸپ بەردٸ, دەپ حابارلايدى قازاقپارات.
گٷلنافيس تاڭباەۆانىڭ مەلٸم ەتۋٸنشە, ناۋرىز ايىنان بەرٸ COVID-19 ينفەكتسيياسىن انىقتاۋ ٷشٸن ايماقتا 20 238-نان اسا تەست سىناماسى الىنعان.
«بٷگٸنگە دەيٸن اتىراۋ وبلىسىنا 29 620 پتر تەست الىندى. كوروناۆيرۋس ينفەكتسيياسىن انىقتاۋ ٷشٸن 20 238 رەت تەست جاسالدى. قازٸرگٸ ۋاقىتتا تەستٸلەۋ نەتيجەسٸنٸڭ مەرزٸمٸ كەشٸكتٸرٸلٸپ جاتقانى تۋرالى شاعىمدار كٶپتەپ تٷسۋدە. وسى ورايدا, ازاماتتارعا زەرتحانالاردا الىنعان بارلىق سىنامالاردى ٶڭدەۋگە ۋاقىتتىڭ تاپشى ەكەنٸن ايتقىم كەلەدٸ. ماماندار تەۋلٸك بويى جۇمىس ٸستەۋدە. ٶكٸنٸشكە وراي, ۇلتتىق ساراپتاما ورتالىعى قىزمەتكەرلەرٸنٸڭ 90 پايىزى كوروناۆيرۋس ينفەكتسيياسىن جۇقتىرىپ, قازٸر ولار تيٸستٸ ەم قابىلداۋدا. بارلىعىنىڭ دا وتباسى, قارت اتا-اناسى, تۋىستارى بار. سوندىقتان, تۇرعىنداردان بولىپ جاتقان جاعدايلارعا تٷسٸنٸستٸكپەن قاراۋىن سۇرايمىن», - دەدٸ گٷلنافيس تاڭباەۆا.
ونىڭ ايتۋىنشا, كەشە تشو كومپانيياسى مەن وبلىستىق دەنساۋلىق ساقتاۋ باسقارماسى پتر اپپاراتىن كاسپيي مەديتسينالىق جەكە كلينيكاسىنىڭ بالانسىنا بەرۋ تۋرالى كەلٸسٸم جاساستى. زەرتحانانىڭ تولىققاندى جۇمىس ٸستەۋٸ ٷشٸن قاجەتتٸ جاعدايلاردىڭ بارلىعى قاراستىرىلعاننان كەيٸن, جۋىق ارادا ەمحانادان كوروناۆيرۋسقا تەست تاپسىرىپ, نەتيجەسٸن الۋعا بولادى. ال, قازٸرگٸ ۋاقىتتا پتر سىنامالارىن ٶڭدەۋمەن «Invivo» مەديتسينالىق زەرتحاناسى اينالىسىپ جاتىر.
