Atyraýda politseiler sýǵa batqan adamdy qutqaryp aldy, dep habarlaidy "Ult aqparat".
«Jaiyq ózeniniń jaǵasyn teksergen politsiia patrýl ekipajy er adamnyń kómekke shaqyrǵan daýsyn estidi. Tún ortasynda mas kúide sýǵa túsken er adam ózenniń ortasyna deiin júzip baryp, jaǵaǵa jete almai qalǵan. Istiń nasyrǵa shaba bastaǵanyn túsinse kerek, aiǵailap kómekke shaqyrady», - deidi politsiia departamentiniń ókilderi.
Onyń baǵyna qarai politseiler sol mańǵa jetip qalǵan.
«Men Damba aýylynda týyp-óskenmin, jaqsy júze alamyn. Biraq nusqaý boiynsha biz qutqarýshylarǵa habar berýge tiispiz, men de sóittim. Keiin qasymdaǵy serigim serjant Jambyl Turymbetovten mashinadan qutqarý toptamasyn ákelýdi suradym. Ýaqyt ozdyrmai sýǵa kúmp berip, er adamnyń jaǵaǵa shyǵýyna kómektestim», - deidi qatardaǵy politsei Oryntai Hýresov.
Tekseris kezinde sýǵa bata jazdaǵan er adamnyń mas bolǵany anyqtaldy. Politsiia basqarmasynda 32 jastaǵy er adamǵa Ákimshilik quqyq buzýshylyq týraly kodekstiń 440-baby boiynsha hattama toltyryldy.
Aita keteiik, Atyraý oblysynda jyl basynan beri sýǵa ketken 12 adamnyń úsheýi mas bolǵan.
