Atyraýda Naýryz merekesine bir derekkózden 116 mln teńge bólingen. Osyǵan bailanysty tiisti mekeme basshylary túsinik berdi, dep habarlaidy QazAqparat Óńirlik kommýnikatsiialar qyzmetine silteme jasap.
Mahambet atyndaǵy Atyraý oblystyq akademiialyq qazaq drama teatrynyń direktory Berik Jámenovtiń aitýynsha, Naýryz merekesine bailanysty jariialanǵan konkýrs boiynsha memlekettik satyp alýǵa jaýapty maman qatelik jibergen.
«10 naýryz kúni teatr «QR Memlekettik satyp alý týraly» zańyna sáikes, bir derekkózden memlekettik satyp alý tásili negizinde úsh mekemeniń baǵa usynystaryn suratty. Eń tómen baǵa usynǵan «ARSEN» jeke kásipkerligimen 116 300 000 teńgege kelisimshart jasadyq. Atqarylǵan jumystardyń qarajaty qabyldaý aktisine sáikes, is-sharalar ótkizilgen naýryz, mamyr, maýsym ailarynda banktegi esepshot arqyly tólendi. Mekemeniń qarjylyq jáne normativtik quqyqtyq aktilerine taldaý jasaý barysynda bul konkýrstyń ashyq portalda kórinis tappaǵanyn anyqtadym. Osyǵan orai, jaýapty mamanǵa tártiptik jaza qoldandym» -deidi Berik Jámenov.
Onyń aitýynsha, jaýapty maman kemshilikti joiý maqsatynda atqarylǵan, qarjysy tólengen jumystardy ashyq portalǵa bir derekkózden memlekettik satyp alý tásili negizinde jariialaǵan. Bul týraly teatr direktoryna eskertpegen. Kelisimshartta kórsetilgen 116 300 000 teńgeniń qazirge deiin 54 850 000 teńgesi igerilgen.
Al, oblystyq mádeniet basqarmasynyń basshysy Aqylbek Rysqalievtyń deregine súiensek, bul máselege bailanysty arnaiy jumys toby qurylǵan.
«Kez kelgen memlekettik organnyń is-sharalar josparyna sáikes, jyl basynda oblystyq máslihattyń sheshimimen qajetti qarajat qarastyrylyp, bólinedi. Budan keiingi protsedýralardyń zań sheńberinde oryndalýy, qarajattyń tiimdi jumsalýy árbir mekemeniń jeke jaýapkershiliginde, iaǵni kelisimshart sheńberindegi qarajatty maqsatyna qarai igerý Mahambet atyndaǵy oblystyq akademiialyq qazaq drama teatrynyń quziretine jatady. Atalǵan máseleniń mán-jaiyn anyqtaý úshin arnaiy jumys toby quryldy. Qazir zerdeleý jumystary júrgizilýde» -dedi Aqylbek Rysqaliev.
