Foto: Atyraý oblystyq TJD
Atyraýda Jaiyq ózeniniń muzy oiylyp, sýǵa túsip ketken eki adamnyń bireýi qutqaryldy. Qazir ekinshi adamdy izdeý jalǵasyp jatyr, dep habarlaidy QazAqparat.
Oblystyq tótenshe jaǵdailar departamentiniń qoǵammen bailanys tobynan málim etkendei, oqiǵa búgin, 5 qańtarda bolǵan.
Atyraý qalasynyń mańyndaǵy Jumysker aýylynan jergilikti ýaqytpen saǵat 11:14-te eki adamnyń Jaiyq ózeniniń muzy oiylyp, sýǵa túsip ketkeni týraly shaqyrtý túsken.
Oqiǵa ornyna jetken oblystyq politsiia departamenti balyq qoryna qylmystyq qol suǵýshylyqqa qarsy is-qimyl bóliminiń inspektorlary, politsiia kapitany Jetkinshek Imanǵaliev pen politsiia aǵa serjanty Aibat Jaýymbaev jedel jetken.
Olar ózenge batyp ketkeli turǵan bir adamdy arqanmen ustap qalǵan.
«Jedel-qutqarý jasaǵynyń qutqarýshylary men politsiia qyzmetkerleri Jaiyq ózenine túsip ketken 1974 jylǵy er adamdy qutqaryp qaldy. Qutqarylǵan er adam oblystyq aýrýhanaǵa jetkizildi», - dep habarlady departamenttiń qoǵammen bailanys toby.
Qazir Jaiyq ózenine túsip ketken 1975 jylǵy er adamdy sý astynan izdestirý jalǵasyp jatyr.
Avariialyq-qutqarý jumystaryna Atyraý oblystyq tótenshe jaǵdailar departamentinen 8 qutqarýshy, 2 tehnika men 1 qaiyq tartylǵan.
