Mahambet Dosmuhambetov óńirdiń ekologiialyq ahýaly talqylanǵan keńeste munai-gaz kompaniialaryn qorshaǵan ortany lastaýdy doǵarýǵa shaqyrdy, dep habarlaidy "Ult aqparat".
«Atyraý – munai-gaz salasy qarqyndy damyǵan aimaq. Alaida, qorshaǵan ortany qorǵaý ózekti máselege ainalyp otyr. Ásirese, munai-gaz salasyndaǵy iri óndiristik kásiporyndardyń atmosferalyq aýaǵa las shyǵaryndylaryn azaitý, kúkirt, taǵy da basqa munai qaldyqtary iisiniń taralýyn boldyrmaý sharalaryn alý, turǵyndarǵa qolaily jaǵdai týǵyzý – búgingi kúnniń basty mindetteriniń biri», - dedi oblys ákimi Mahambet Dosmuhambetov.
Oblystyq Ekologiia departamentiniń basshysy Álibek Bekmuhambetovtiń málimetinshe, biyl Atyraý qalasynyń atmosferalyq aýa sapasynan 56 synama alynyp, 331 tekserý júrgizilgen. Byltyrǵy 9 aida qorshaǵan ortaǵa 164, 90 myń tonna qaldyq tastalsa, biylǵy kórsetkish 115,60 myń tonnany quraǵan.
«Biylǵy 1 qarashada júrgizilgen monitoring kezinde «AMÓZ» JShS qubyrynan «Sasyq sai» býlaný alańyna tasymaldaityn kanalǵa munai ónimderi aralasqan sýlardyń tógilgeni anyqtaldy. Atalǵan derek «AMÓZ» JShS-niń biologiialyq tazartý qondyrǵysyndaǵy aqaýlarǵa bailanysty sarqyndy sýdyń quramyndaǵy munai ónimderi men basqa da lastaýshy zattardan durys tazalanbaýy saldarynan oryn alǵan», - dedi Álibek Bekmuhambetov.
Mahambet Dosmuhambetov «AMÓZ» JShS basshylyǵyna «Sasyq sai» býlaný alańynyń zaýytqa qatysty bóligin qalpyna keltirýge jedel kirisýdi tapsyrdy.
«Atyraýda aýaǵa jaǵymsyz kúkirt iisiniń taralýynyń negizgi sebebiniń biri munai óńdeý zaýytynyń kárizdik sý tazartý qondyrǵylarynyń qalypty jumys istemeýinen ekeni eshkimge jasyryn emes. Kárizdik sýlar quramynda joǵary dárejede munai qaldyqtarynyń bolýy quzyrly organdar tarapynan áldeneshe ret anyqtalǵan. Bul jerde aiyppul tólep qutylý jetkiliksiz, halyqtyń densaýlyǵyn aiyppulmen túzei almaisyz», - dep qatań eskertý jasady óńir basshysy.
