Atyraýda qazaq tili men ádebietinen ótken halyqaralyq olimpiadaǵa alty memleketten 62 oqýshy keldi, dep habarlaidy "Ult aqparat".
6 shildede Qurmanǵazy atyndaǵy mádeniet úiinde qazaq tili men ádebietinen halyqaralyq olimpiada júldegerlerin marapattaý saltanaty boldy. Qytai, Mońǵoliia, Qyrǵyzstan, Resei, Iran, Ózbekstan memleketterinen kelgen 62 oqýshy ana tilinen bilimderin synǵa saldy. Júldegerlerge oblys ákiminiń birinshi orynbasary Serik Shapkenov marapattaryn tapsyrdy.
"Qazaq diasporasy ókilderiniń basqa elderde tursa da, ana tilin jetik meńgergenderi, óz tilderinde sóilep, bilimderin jetildiretinderi qýantady. Halyq danalyǵynda aitylǵandai, "óz tilin umytqan ult - tamyryn joǵaltady". Basqa elderde ómir súrse de, qazaq tilin meńgerip, otbasylarynda osy tilde sóilesetin osyndai balalardyń arqasynda ana tilimizdiń bolashaǵy baiandy bolaryna senemin", - dedi olimpiada qatysýshylaryna Serik Shapkenov.
Halyqaralyq olimpiada qortyndysy boiynsha 5 qatysýshy altyn medal, 8 qatysýshy kúmis, 15 qatysýshy qola medal ielendi.
"Balalar túrli atalymdar boiynsha da marapattaldy. Úzdik kórsetkish kórsetkenderge Qazaqstandaǵy JOO-da tegin oqýǵa sertifikattar, rektor granttary berildi", - deidi oblystyq bilim berý basqarmasy basshysynyń mindetin atqarýshy Jansulý Tóremuratova.
Olimpiada qortyndysy boiynsha barlyq balalar ana tiline degen qurmetteri úshin túrli syilyqtarǵa ie boldy.
Aita ketý kerek, marapattardyń kópshiligin Ózbekstan Respýblikasynan kelgen etnikalyq qazaqtar jeńip aldy.
