kórneki sýret
Atyraýda kóligine qaitys bolǵan adamnyń memlekettik nómirin taǵyp alǵan turǵyn ustaldy, dep habarlaidy Sputnik agenttigi Polisia.kz portalyna silteme jasap.
Politsiia basqarmasyna 64 jastaǵy azamatsha óziniń qaitys bolǵan kúieýiniń atyna aiyppul kele beretindigi týraly shaǵymdandy. Atalaǵan aryz boiynsha patrýldik politsiia qyzmetkerleri jedel basqarý ortalyǵynyń beinebaqylaý qyzmetkerlerimen birlesip, kóligine qaitys bolǵan adamnyń memlekettik nómirin taǵyp júrgen 20 jastaǵy qala turǵynyn anyqtady. Jigit qaitys bolǵan adamnyń memlekettik nómirin óziniń Resei memleketinde tirkelgen VAZ-21114 avtokóligine taǵyp júrgen.
Tekseris barysynda 20 jastaǵy azamat taǵyp júrgen jalǵan nómirdiń atyna tirkelgen 350 840 teńgeniniń 16 aiyppuly bar ekeni anyqtaldy. Onyń aitýynsha, ol memlekettik nómirdi taýyp alǵan. Qazirgi ýaqytta atalaǵan azamatqa qatysty is-qujattar jinaqtalýda.
Odan basqa, 9 jeltoqsan kúni saǵat 23:00 shamasynda Atyraý qalasy politsiia basqarmasynyń jedel basqarý ortalyǵynyń beinebaqylaý qyzmetkerleri Áýezov kóshesiniń boiynan kúdik týdyrǵan Lada Priora avtokóligin baiqap, politsiia qyzmetkerlerine habarlaǵan.
Politsiia qyzmetkerleri kólikti toqtatqanda onyń memlekettik nómiri jalǵan ekeni anyqtaldy. Kólik iesi 20 jastaǵy júrgizýshige qatysty Ákimshilik quqyqbuzýshylyq kodekstiń 590-babynyń 4-bólimi boiynsha (jalǵan nemese qoldan jasalǵan memlekettik tirkeý nómiri bergileri bar kólik quralyn basqarý) hattama toltyrylyp, is sotqa joldandy. Endi ol 20 ailyq eseptik kórsetkish mólsherinde aiyppul tóleýi nemese bir jyl merzimge kólik quraldaryn basqarý quqyǵynan aiyrylýy múmkin.
Oblystyq politsiia departamentiniń málimetinshe, jyl basynan beri jalǵan nemese qoldan jasalǵan memlekettik tirkeý nómirin paidalanǵan 20-dan astam júrgizýshi anyqtaldy, olardyń barlyǵy ákimshilik jaýapkershilikke tartyldy.
