Atyraýda №1 qalalyq emhananyń esepshotynan 70 mln teńge urlanǵan. Qazir tekserý bastaldy, dep habarlaidy "Ult aqparat".
Baspasóz qyzmetiniń málimetine qaraǵanda, atalǵan emhananyń qyzmetkerleri koronavirýs infektsiiasyn juqtyrǵan meditsinalyq qyzmetkerlerge tólenetin ótemaqyǵa bailanysty basqarmaǵa júgingen. Olarǵa basqarma basshysynyń mindetin ýaqytsha atqarýshy Ashan Baidýáliev arnaiy baryp, ótemaqynyń zań talaptary sheńberinde komissiia sheshimi negizinde tólenetinin jetkizgen.
«Prezidenttiń tapsyrmasyna sáikes, Densaýlyq saqtaý ministrligi men Eńbek jáne halyqty áleýmettik qorǵaý ministrliginiń qyzmet barysynda koronavirýs juqtyrǵan meditsinalyq qyzmetkerlerge epidemiologiialyq tekserý nátijesinde ótemaqy tóleý týraly birlesken buiryǵy bar. Soǵan sai keletin dárigerlerge ótemaqy tólenedi. Qazir Atyraý oblysynda koronovirýs infektsiiasy men virýstyq pnevmoniia juqtyrdyq dep járdemaqy alý úshin 955 meditsinalyq qyzmetker qujat tapsyrǵan. Olardy koronovirýs indetimen kúreste qyzmet etken meditsina qyzmetkerlerine ústemaqy men ótemaqyny tóleý komissiiasy turaqty túrde qaraýda. Osy kezge deiin komissiia 9 otyrys ótkizgen. Qujattardyń 474-si maquldanyp, 481-i keri qaitarylǵan. Biraq jaqynda atalǵan buiryqqa birqatar ózgeris engizilýine bailanysty dárigerlerdiń qujattaryn komissiiaǵa qaita berip, qazir qaralyp jatyr», - dedi Ashan Baidýáliev.
Onyń aitýynsha, meditsinalyq qyzmetkerlerge koronavirýspen kúres kezinde jalaqysyna qosylatyn ústemaqy ýaqytyly tólengen. Al №1 Atyraý qalalyq emhananyń esepshotyndaǵy 70 mln teńge elektrondy túrde urlanǵan. Qazir tiisti quqyq qorǵaý organdary tergeý-anyqtaý jumystaryn júrgizip jatyr.
