Atyraýda búgin dúniege kelgen ulǵa ata-anasy Abai esimin berdi, dep habarlaidy "Ult aqparat".
Óńirlik kommýnikatsiialar qyzmetiniń málimetinshe, sábi Abai búgin, 10 tamyzda tańǵy saǵat 6.40-ta jaryq dúnie esigin ashqan. Salmaǵy – 3 keli, 565 gramm, al, boiy – 53 santimetr.
«Otaǵasymen aqyldasyp, qazaqtyń uly aqynynyń danalyǵyn, aqyl-oiyn bersin degen nietpen tórtinshi perzentimizdiń esimin Abai dep ataýdy uiǵardyq. Onyń ústine dárigerler 15 tamyzda bosanasyń degen edi. Biraq, sábiimiz búgin, 10 tamyzda Abai kúni atalyp ótetin tańda ómirge kelip, esimin ózi tańdap alǵandai boldy. Úidiń úlkenderi de bizdiń tańdaýymyzdy qoldap otyr. Abaidyń eki aǵasy men apasy bar», - deidi 37 jastaǵy anasy Aqmaral Bádelova.
Atyraý oblystyq perinataldyq ortalyǵynyń ana men bala birlesken bólimshesiniń meńgerýshisi Nurlan Jubanyshevtyń aitýynsha, 10 tamyz –Abai kúni ortalyqta 5 ul, 5 qyz dúniege kelgen.
«Sábilerdiń mundai erekshe adamdardyń mereitoiymen tuspa-tus dúniege kelýi – erekshe oqiǵa. Bul balalardyń bolashaǵyna jaqsy áser etedi dep oilaimyn» deidi Nurlan Jubanyshev.
