Atyraýda bir túnde eki júkti áiel qaitys boldy. Bul týraly oblystyq densaýlyq saqtaý basqarmasynyń basshysy Ashan Baidývaliev málimdedi, - dep habarlaidy Tengrinews.kz agenttigi ATPress.kz saityna silteme jasap.
Basylym málimetinshe, eki ólim de 12 qazanda tirkelgen. Júkti áieldiń biri Atyraý oblystyq aýrýhanasynda, ekinshisi Maqat aýdanynda qaitys bolǵan.
"Barlyq reanimatsiialyq sharalarǵa qaramastan, dárigerler júkti áielderdi aman alyp qala almady", - dedi Ashan Baidývaliev brifingte.
Oblystyq densaýlyq saqtaý basqarmasy basshysynyń ana men bala jónindegi orynbasary Janar Sadýovanyń aitýynsha, 33-34 jas aralyǵyndaǵy áielderdiń ekeýi de Maqat aýdanynyń turǵyndary.
"Eki jaǵdaida da júkti áielder jaǵdaiy nasharlap aýrýhanaǵa túsken. Birinshi áieldiń óliminiń sebebi - cepsis, septitsemiia, ókpe qabynýy. Dál osy kúni Maqat aýdandyq aýrýhanasynda taǵy da bir júkti áiel qaitys boldy. Ol aýrýhanaǵa shuǵyl jetkizilip, júregi úsh ret toqtap qalǵan. Naýqas júktiliktiń 32 aptalyǵynda bolǵan. Ony dereý jasandy tynys alý apparatyna qostyq. Qajetti meditsinalyq kómek kórsettik, biraq áieldi aman alyp qala almadyq. Oǵan virýstyq-bakteriialyq genez sepsisi degen diagnoz qoiyldy. Eki naýqastyń ólimin zertteý jumystary aiaqtalǵannan keiin ǵana tolyq aita alamyz” , - dedi Janar Sádýova.
