Atyraýda ókpesi 96 paiyz qabynyp, bir ai boiy ókpeni jasandy jeldetý apparatyna qosylǵan áiel emdelip shyqty, dep habarlaidy "Ult aqparat".
Oblystyq densaýlyq saqtaý basqarmasy baspasóz qyzmetinen málim etkendei, 59 jastaǵy Altyn Tólegenova maýsym aiynyń basynda Inder aýdandyq aýrýhanasyna túsken.
Jaǵdaiy nasharlaǵan soń Atyraý qalasyndaǵy modýldik aýrýhananyń jansaqtaý bólimine aýystyrylǵan.
«Jansaqtaý bóliminde kelgende eki jaqty pnevmoniia, ókpeniń 96% qabynýy degen diagnoz qoiyldy. Bir ai boiy ókpeni jasandy jeldetý apparatyna qosýly jattym.
Dárigerlerdiń kúsh-jigeriniń nátijesinde qaýipti virýstan aman qaldym. Meni beiindi bólimsheniń palatasyna aýystyrdy, onda emdeýdi jalǵastyrdym», - deidi Altyn Tólegenova.
Búgin, 10 tamyzda Altyn Tólegenova modýldik aýrýhananyń infektsiialyq statsionarynan shyǵaryldy. Qazir onyń ókpesi 12% zaqymdanǵan. Endi úsh ai boiy turǵylyqty mekenjaiy boiynsha dárigerlerdiń baqylaýynda bolady. Sondai-aq, arnaiy ońaltýdan ótedi.
«Men 10 kún boiy ottegi kontsentratorynyń kómegimen dem alamyn. Sodan keiin dárigerlerdiń baqylaýymen ókpeniń jumysyn qalpyna keltiremin. Osy oraida emdelý kezinde dárigerlerge kórsetken qamqorlyǵy men jyly sózderi úshin alǵysymdy bildirgim keledi. Al, turǵyndardan týǵan-týystaryńyz ben jaqyndaryńyzdyń qaýipsizdigi úshin
betperde kiip, adamdar kóp jinalatyn oryndarǵa barmaýdy suraimyn», - deidi Altyn Tólegenova.
