Atyraý soty balalaryn satqan áieldi 8 jylǵa bas bostandyǵynan aiyrýǵa úkim shyǵardy. Onyń 4 sybailasy 3 shartty túrde 3 jylǵa sottaldy.
Atyraý oblysynyń kámeletke tolmaǵandar isteri jónindegi mamandandyrylǵan aýdanaralyq sotynyń 5 sottalýshyǵa qatysty úkimi apelliatsiialyq tártipte qaraldy.
«S.A. júkti bola tura materialdyq jaǵdaiyn jaqsartý maqsatynda óziniń balasyn dúniege kelgen soń satatyn bolyp, otbasylyq jup R.B. jáne R.G.-men sóz bailasqan. Aqshany bergennen keiin otbasylyq jup balany ózderine alǵan. S.A. qaitadan júkti bolǵan. Sol kezde bótenniń múlkin aldaý jáne senimdi teris paidalaný jolymen jymqyrý úshin basqa eki otbasylyq jupqa balany belgili bir sommaǵa satýǵa ýáde bergen. Alaida, olardyń aqshasyn alyp, izin sýytqan. Nátijesinde jábirlenýshilerge 2,3 mln. teńge zalal keltirilgen», - dep habarlady sottyń baspasóz qyzmeti.
Osy kezde sottalýshy S.A. óziniń balasyn dúniege kelgen soń satatyn bolyp, basqa otbasylyq jup I.B. jáne Ý.A.-men sóz bailasqan. Otbasylyq jup bala dúniege kelgenshe sottalýshy S.A.-nyń shotyna aqsha aýdaryp otyrǵan. Bala dúniege kelgen soń I.B. jáne Ý.A. ony óz otbasyna alǵan. Otbasylyq juptar R.B., R.G. jáne I.B., Ý.A. jańa týǵan balalardy aqshaǵa satyp alyp, ákelikti anyqtap, balalardyń týý týraly kýálikterine óz atyn jazdyrǵan.
«Sot úkimimen S.A. adamdar tobynyń aldyn ala sóz bailasýymen, birneshe ret dármensiz kúidegi kámeletke tolmaǵandar saýdasymen ainalysqany, sondai-aq, birneshe ret alaiaqtyq jasaǵany úshin 8 jyl merzimge bas bostandyǵynan aiyrý jazasyna sottalǵan. Al, R.B., R.G., I.B. jáne Ý.A.-ǵa adamdar tobynyń aldyn ala sóz bailasýymen, dármensiz kúidegi kámeletke tolmaǵandar saýdasymen ainalysqany úshin QR Qylmystyq kodeksiniń 55-babynyń 4-bóligin qoldanýmen shartty túrde 3 jyl merzimge bas bostandyǵynan aiyrý jazasyna taǵaiyndalǵan», - dep habarlady sottyń baspasóz qyzmeti.
Sottalýshylar men advokattar oblystyq sottyń qylmystyq ister jónindegi sot alqasyna apelliatsiialyq shaǵym túsirdi. Shaǵymdanýshylar sot úkiminiń kúshin joiyp, aqtaý úkimin shyǵarýdy surady.
«Alqa apelliatsiialyq shaǵymdardy zerdelei kele, sot úkimin ózgertýge nemese onyń kúshin joiýǵa negizder tappady. Osyǵan bailanysty qylmystyq ister jónindegi sot alqasynyń qaýlysymen birinshi saty sotynyń úkimi ózgerissiz, apelliatsiialyq shaǵymdar qanaǵattandyrýsyz qaldyryldy», - dep málim etti sottyń baspasóz qyzmetinen.
