© Sputnik / Dmitrii Astahov /
Atyraý ákimdiginiń qyzmetkerleri kásipkerdiń jer telimin keńeitýden bas tartqan, dep habarlaidy QazAqparat.
Sybailas jemqorlyqqa qarsy is-qimyl agenttigi Atyraý oblysy boiynsha departamentiniń baspasóz qyzmetinen málim etkendei, kásipkerdiń jer ýchaskesin keńeitýden bas tartqan Atyraý qalasy ákimdiginiń laýazymdy tulǵalary tártiptik jaýapkershilikke tartylǵan.
«Sheshim jer komissiiasynyń hattamasy negizinde ótinishti qaraý merzimderin buza otyryp, bas tartý týraly qaýly shyǵarmai qabyldanǵan. Osyǵan bailanysty kásipker memlekettik organnyń sheshimine shaǵymdandy. Departament qyzmetkerleri kásipkerdiń dálelderin tekserip, kórsetilgen faktilerdi rastady. Qazir jergilikti atqarýshy organ jer telimin kásipkerge berý boiynsha máseleni qarastyryp jatyr. Kináli tulǵalar tártiptik jaýapkershilikke tartyldy», -dep habarlady departamenttiń baspasóz qyzmeti.
Sondai-aq, Jylyoi aýdanynda kásipkerlerge jer ýchaskelerin bólý, biznes nysandaryna infraqurylym jetkizý jónindegi máselelerge syrtqy taldaý júrgizilgen.
«Jylyoi aýdandyq jer komissiiasy 2020-2022 jyldary 27 kásipkerdiń aýyl sharýashylyǵy maqsatyndaǵy jer ýchaskesiniń nysanaly maqsatyn ózgertken. Zań talaptaryna sáikes komissiiamen nysanaly maqsatyn ózgertý kózdelmegen. Máselen, Jylyoi aýdany ákimdiginiń qaýlysymen kásipkerge buryn paidalanýda bolǵan jer ýchaskesine qosymsha 8,0 gektar zańsyz berilgen. Qosymsha berilgen jer ýchaskesi negizgi jer ýchaskesinen 500 ese artyq. Kásipkerge berilgen jer ýchaskesi birneshe bólikke bólingen. Bul zańǵa qaishy, ári sybailas jemqorlyq táýekelderiniń bar ekenin kórsetedi. Jylyoi aýdanyndaǵy jergilikti atqarýshy organdarynyń laýazymdy tulǵalary «Teńiz» vahta kentindegi jer ýchaskelerin aýktsion arqyly saýda-sattyqqa qoimai, kásipkerler úshin jasandy ákimshilik kedergiler jasaǵany anyqtaldy», - deidi departament basshysynyń birinshi orynbasary Nurlan Jahin.
