Atyraýda sheteldik jáne qazaqstandyq boksshylardyń qatysýymen uly oishyl Abaidyń 175 jyldyq mereitoiyna arnalǵan jarys ótti, dep habarlaidy Atyraý oblystyq kommýnikatsiialar qyzmeti.
Sport sharasy Atyraý oblysy ákimdiginiń qoldaýymen jáne «SULEIMEN Promotions» proýmoýterlik kompaniiasynyń uiymdastyrýymen ótti.
5 jekpe-jekten turatyn kásipqoi boks keshi sanitarlyq normalarǵa sai kórermensiz ótip, jurtshylyqqa «HABAR» telearnasy arqyly tikelei efirde kórsetildi.
Dodada qazaqstandyq 22 jasar Bekzat Nurdáýletovtiń qarsylasy tanzaniialyq 28 jastaǵy Ibrahim Maokala boldy. Alty raýndqa josparlanǵan jekpe-jek ekinshi raýndta nokaýtpen aiaqtaldy. Osylaisha qazaqstandyq boksshy Bekzat Nurdáýletov kásipqoi bokstaǵy debiýtin sátti bastady.
Al Danila Semenov tanzaniialyq qarsylasy Mýssa Adjibýdy tórtinshi raýndta tehnikalyq nokaýtqa jiberdi. Bul aýyr salmaqtaǵy jekpe-jek alty raýndqa josparlanǵan.
Keshtiń úshinshi jekpe-jegi qazaqstandyq Evgenii Pavlov pen Tanzaniiadan kelgen tájiribeli Gýdlak Mremanyń arasynda ótti. Ekinshi jeńil salmaqtaǵy bul jekpe-jek ekinshi raýndta aiaqtaldy. Evgenii Pavlov qarsylasyn nokaýtqa túsirip, jeńiske jetti.
Abylaihan Júsipov kásipqoi bokstaǵy alǵashqy jekpe-jegin tanzaniialyq Meshak Mvankemvamen ótkizdi. Birinshi orta salmaqtaǵy aiqas alty raýndqa sozylyp, tóreshiler sheshimimen jekpe-jek Júsipovtiń jeńisimen aiaqtaldy.
Basty aiqas qazaqstandyq boksshy Bek Nurmaǵanbet pen tanzaniialyq Abdalah Pazimen arasynda uiymdastyryldy. Jartylai aýyr salmaqtaǵy jekpe-jek alty raýndqa sozylyp, sheshim boiynsha Nurmaǵanbettiń jeńisimen aiaqtaldy.
Aita keteiik, atalǵan sporttyq dodada qazaqstandyq úsh birdei sportshy kásipqoi bokstaǵy alǵashqy jekpe-jegin ótkizdi. Olar - Danila Semenov, Abylaihan Júsipov, Bekzat Nurdáýletov.
