Atyraý oblysyndaǵy Qarabatan aýylynda jataqhanada bolǵan órtten zardap shekkender men qaza tapqandardyń otbasylaryna kómek retinde merdiger kompaniia 50 million teńge bóldi. Qarjy depozittik shottarǵa salynbaq, dep habarlady KTK.
Kompaniia qyzmetkerleriniń barlyǵy saqtandyrylǵandyqtan, eshkim de ótemaqydan qaǵylmaidy. Al, osy qaiǵyly jaǵdaiǵa bailanysty qurylǵan úkimettik komissiia órtke toqpen jylytylatyn pesh sebepker boldy degen boljam jasap otyr.
"Jataqhana elektr jylytqyshtarmen jylytylǵan. Sodan toqqa artyq kúsh túsken. Biraq bul - naqty cebep emes", — deidi QR Eńbek jáne halyqty áleýmettik qorǵaý ministrligi áleýmettik qorǵaý jáne baqylaý komiteti tóraǵasynyń orynbasary Tólegen Ospanqulov.
Elektr symynyń qysqa tuiyqtalýynan tutanǵan órt sol mańda turǵan ózge de turmystyq zattardy sharpyǵan. Osy jaǵdaidan keiin jumysshylar turyp jatqan taǵy da 6 jataqhanany teksergen komissiia olardyń da qaýipsizdik talaptaryna múldem sáikes kelmeitinin anyqtapty. Endi sol kemshilikter túzelmeiinshe, olarda turýǵa tyiym salyndy.
Eske salaiyq, qaiǵyly jaǵdai 2 naýryz kúni "Qarabatan" jaýapkershiligi shekteýli seriktestigine qarasty Gaz týrbinaly elektr stantsiiasy salynyp jatqan qurylys alańyndaǵy jataqhanadan shyqqan edi. Jalpy aýmaǵy 500 sharshy metrge jýyq nysan túgel órtenip, 7 adam qaza tapqan bolatyn.
