Foto: instagram.com/atyrauoil.official
Atyraý qalasynda 45 jastaǵy áiel kóppáterli turǵyn úidiń 8-qabatynan qulap ketti. Ol oqiǵa ornynda kóz jumdy.
Atyraý oblysy politsiia departamentiniń baspasóz qyzmeti bul derekti rastady. Oqiǵa búgin, 9 qańtarda bolǵan.
— Kúndizgi saǵat 11:00 shamasynda 1979 jylǵy áiel Atyraý qalasyndaǵy «Almagúl» shaǵyn aýdanyndaǵy kópqabatty úidiń biriniń 8-qabatynan qulaǵan. Qazir áieldiń ólimine qatysty QR Qylmystyq kodeksiniń 105-babymen qylmystyq is qozǵaldy. Oqiǵanyń mán-jaiy tekserilip jatyr. Atalǵan derek boiynsha keshendi tergeý amaldaryn júrgizý bastaldy, — dep habarlady departamenttiń baspasóz qyzmeti.
Áieldiń turǵyn úidiń joǵarǵy qabatynan qulaýyna ne túrtki bolǵany ázirge belgisiz. Oqiǵanyń sebebi tergeý kezinde anyqtalady.
