Atyraý oblysyna jumys sapary barysynda Premer-Ministrdiń orynbasary Berdibek Saparbaev aimaq jastarymen jáne muǵalimder qaýymymen kezdesti, dep habarlaidy "Ult aqparat".
Kezdesýdi ashqan QR Aqparat jáne qoǵamdyq damý vitse-ministri Daniiar Esin Atyraý oblysynda memlekettik baǵdarlamalardy júzege asyrýdyń oń kórsetkishterin atap ótti.
Óńirdiń belsendi jastary jastar saiasatyna qatysty máselelerge nazar aýdardy. Memleket tarapynan jastarǵa qoldaý kórsetý jaily aityldy. Qatysýshylardyń biri volonterler máselesin kóterdi. Prezident Qasym-Jomart Toqaevtyń tapsyrmasy boiynsha 2020 jyl Volonter jyly bolyp jariialandy. Biraq bul qatarǵa kolledj stýdentteri kire almaidy.
Berdibek Saparbaev Bilim jáne ǵylym ministrligine osy máseleni qaraýǵa tapsyrma beretinin aitty. Elbasy jastar saiasatyn damytýǵa únemi kóńil bólip keldi.
Vitse-premer Volonter jyly Jastar jylynyń logikalyq jalǵasy bolatynyn atap ótti. Alda jastar bastamalaryn qoldaý baǵytynda úlken jumystar tur.
Atyraý oblysynyń ákimi Nurlan Noǵaev ta óz pikirin bildirdi. «Volonterlar qozǵalysy – bul borysh, ony yqylaspen atqarý kerek. Ózińdi jylytý arqyly ózgelerge sáýle syila, qaitarymyn kútpe degen sóz bar. Atyraýda negizgi qyzmeti bar, biraq bos ýaqytynda jedel járdemge baryp, adamdarǵa kómektesetin jigit bar. Naǵyz volonterlyq – osy», - dedi Nurlan Noǵaev
Kezdesýge stýdentter, jas kásipkerler men volonterlar jinaldy. Qatysýshylardyń biri biznestegi alǵashqy qadamy jaiynda aitty. Jastar vitse-premerge ózderiniń alǵashqy jetistikteri týraly baiandady. Saparbaev óz kezeginde arman jolynda múmkindikterdi jiberip almaýǵa keńes berdi.
Vitse-premer jastardy eńbek pen bilimge talpynýǵa, jat aǵymdar jeteginde ketpei, biznes negizderin meńgerip, memlekettik qoldaý baǵdarlamalaryn maqsatty paidalanýǵa shaqyrdy.
Berdibek Saparbaev elimizdegi jastar qozǵalysynyń mańyzdylyǵyn atap ótip, dástúrimizdi umytpaý kerektigine toqtaldy. Bolashaqtaǵy órkendeýimizdiń negizi de osy bolmaq.
Óskeleń urpaqtyń máseleleri oblystyq daryndy balalarǵa arnalǵan ulttyq gimnaziiadaǵy oqytýshylar quramymen bolǵan kezdesýde de qozǵaldy. Berdibek Saparbaev tárbie máselesine toqtaldy.
«Otbasy tárbiesi, mádeni, moraldyq-adamgershilik qundylyqtaryna qatysty da problemalar bar. Muny ashyq túrde sheshý kerek. Osy baǵytta pedagogterdiń kómegi kerek», - dedi ol.
Kezdesýde sóilegen QR Bilim jáne ǵylym ministri Ashat Aimaǵambetov pedagog mártebesi týraly zań aiasynda qandai josparlar baryn aitty. Muǵalimder endi ózderin senimdi sezinetin bolady. Daiyndalǵan zań jobasy memleket basshysy qoiǵan orta bilim berý júiesin damytý, bilim sapasyn kóterý boiynsha mindetterge jaýap beredi. Zań jobasyn daiyndaýdyń basty ideiasy muǵalimderdiń júktemesin qysqartyp, tiesili emes mindetterdi atqarýdan qorǵaý, bos ýaqyttaryn ózderin damytýǵa, shyǵarmashylyqqa arnaýǵa negizdelgen.
«Biz munda muǵalimderdiń máselelerin sheshý úshin jinaldyq. Másele – bilim sapasynda. Eger bilim berý sapaly bolmasa, tárbie protsesi de bolmaidy, bul bizge paidaly ma? Balalarymyzdy otansúigishtikke, úlkenderdi qurmetteýge, bilim men eńbekke tárbieleýimiz kerek», - dedi Berdibek Saparbaev. Premer-Ministr orynbasary Atyraý oblysynda bul baǵytta kóp jumys júrip jatqanyn atap ótti.
«Memleket basshysy qoiǵan mindetterdiń bárin oryndaimyz. Eki jyl buryn oblystyq biýdjetten mektep túlekterine 221 grant bólindi. Onyń 176-sy bilim berý salasynda, ótken jyly 150-den astam grant berildi.Biraq áli kúnge deiin bastaýysh synyptar men orys tili muǵalimderi jetispeidi. Bul problema sheshiledi.Úsh aýysymdyq mektepter máselesin sheshý úshin 9 mektep salýymyz kerek. Biyl 2 mektep saldyq. Alty mekteptiń qurylysy júrip jatyr. Úsh mekteptiń jobalaý-smetalyq qujattamasy jasalýda», - dep atap ótti Nurlan Noǵaev.
