Sý tasqyny qaýpine bailanysty Atyraý oblysynyń Saǵyz aýylynan evakýatsiialanǵan turǵyndar úiine oraldy, dep habarlaidy QazAqparat.
Oblystyq Tótenshe jaǵdailar departamenti baspasóz qyzmetiniń málimetinshe, 30 naýryzda saǵat 22:00-de Noǵaity ózeni tasyǵan.
Noǵaity ózeni Aqtóbe oblysynan bastalyp, Atyraý oblysyndaǵy Saǵyz aýyly arqyly aǵyp, Qońyrsai ózenine quiylady. Ózenniń tasýyna qardyń erýi sebep bolǵan. Sý deńgeii shamamen 3 metrge kóterildi.
«Sol sebepten, Saǵyz aýylyndaǵy birneshe úidi sý basý qaýpi tóndi. Turǵyndardy qutqarý jumysyna Tótenshe jaǵdailar departamentiniń (18 qyzmetkeri), jergilikti atqarýshy organnyń (25 qyzmetkeri), jergilikti turǵyndar (100 adam), aýdandyq politsiia bóliminiń (2 qyzmetker 2 tehnika), «Shanhai kontrakshn» JShS (3 qyzmetker, 1 tiegish), «Adai» JK (3 qyzmetker 1 tiegish), «Erbolat» JK (1 qyzmetker, 1 tiegish) jáne «Qazaqstan temirjoly» (30 qyzmetker) kompaniiasynyń qatysýymen turǵyndardy jergilikti mektep pen kolledjge evakýatsiialaý júrgizildi. Al ózen jaǵasy qum úiindisimen bekitildi», - dep habarlady departamenttiń baspasóz qyzmeti.
Evakýatsiialanǵan turǵyndar sany – 50 adam. Onyń ishinde 23 bala bar.
«Búgin, 31 naýryzda, saǵat 09:00 shamasynda Noǵaity ózenindegi sý deńgeii tómendedi. Sý basý qaýpi seiilgennen keiin saǵat 03:30-da evakýatsiialanǵan turǵyndar úiine oraldy», -dep málim etti departamentten.
