Búgin QR Ishki ister ministriniń buiryǵymen Atyraý oblysynyń politsiia departamentine jańa bastyq taǵaiyndaldy, dep habarlaidy "Ult aqparat".
Departamenttiń jańa basshysy - Qamza Úmbetqaliev. Ol - 56 jasta, sońǵy úsh jylda departament bastyǵynyń birinshi orynbasary bolyp jumys istegen.
QR IIM Qaraǵandy joǵary mektebin bitirgen. Eńbek jolyn Atyraý oblystyq IID jedel izdestirý bóliminiń jedel ýákili retinde bastaǵan. Ár jyldary aýdandyq politsiia bólimderin basqarǵan, 2012-2016 jyldary Atyraý IID bastyǵy bolǵan.
Eske sala keteiik, buǵan deiin Ishki ister ministriniń orynbasary Aleksei Kalaichidi Atyraý oblysy Politsiia departamentiniń bastyǵy Aian Dúisenbaevtyń nelikten qyzmetinen bosatylǵanyn túsindirgen bolatyn.
«Shynynda da, mundai jaǵdai tirkeldi. Ózderińiz biletindei, 13 mamyrda áleýmettik jelilerde Atyraý oblystyq Politsiia departamenti bastyǵynyń politsiia general-maiory shenin alýyna orai uiymdastyrylǵan sharaǵa qatysqany týraly video tarady. Osyǵan bailanysty ministrdiń tapsyrýymen qyzmettik tergeý bastalyp, Atyraýǵa komissiia 14 mamyrda jiberildi. Ol komissiiany ózim basqardym. Ol jerde tártiptik komissiia ótkizdik. Sonyń qorytyndysy boiynsha ministrge (Erlan Turǵymbaevqa) Aian Dúisenbaevty qyzmetinen bosatý týraly usynys joldadyq», - degen bolatyn Aleksei Kalaichidi.
