Nurlan Noǵaev halyqty balabaqsha biznesimen ainalysýǵa shaqyrdy, - dep habarlaidy "Ult aqparat".
Keshe, 23 qańtarda Atyraý oblysynyń əkimi Nurlan Noǵaev Maqat aýdanyna jumys saparymen baryp, aýdannyń əleýmettik-ekonomikalyq jaǵdaiymen tanysty. Jiynǵa oblystyń əleýmettik salasyna jaýapty qyzmetkerler qatysty.
Keńeste aimaqtaǵy bilim berý, densaýlyq saqtaý, jumyspen qamtý, dene shynyqtyrý jáne sport salalarynyń jaǵdaiy talqylandy.
Condai-aq, oblystaǵy bilim salasynyń hali týraly esep bergen bilim berý basqarmasynyń basshysy Nursəýle Sailaýova balabaqshalarda orynnyń jetpei otyrǵanyn aitty. Ol 3-6 jas aralyǵynda kezekte turǵan órenderdiń 85 paiyzynyń ǵana mektepke deiingi mekemelerge baryp júrgenin jetkizdi. 3716 balanyń buǵan múmkindigi bolmai úide tárbie alyp jatyr. Sonyń ishinde Maqat aýdanynda balabaqsha kezegindegi oqýshylardyń 10 paiyzyna oryn joq ekeni belgili boldy.
Sonymen qatar, aimaq basshysy Nurlan Noǵaev balabaqsha salý jumystaryn jedeldetý kerektigin aita kele, kezek problemasyn sheshýge jeke kásipkerlerdi de tartý máselesin qozǵady.
"Memleket balabaqshalar men mektepterdi kóptep salyp jatyr, salady da. Biraq, kezek máselesin tezirek sheshý úshin bul iske jeke kásipkerlerdi tartý jumysyn kúsheitý kerek. Turǵyndardyń ózderi bas kóterip balabaqshalar ashsyn. Bul biznespen ainalysamyn degenderge memleket qoldaý kórsetip otyr", - dedi Nurlan Noǵaev.
Aimaq basshysy halyq qamyn tek basshylar emes, turǵyndardyń ózderi de kúittep, jumys isteý kerektigin aitty.
"Qazir balabaqsha ashqysy keletinder úshin engizilgeli jatqan qoldaýdyń bir túri retinde kezekten alyp tastaý máselesin aitýǵa bolady. Buryn balasyn jeke balabaqshaǵa ornalastyrǵan ata-ana kezegi kelgende memlekettik mekemege aýysyp ketetin. Ol osylaisha eki jaqqa da salmaq salyp, basqa balalardyń ornalasýyna kedergi keltiretin. Endigi ortaq standartta jeke balabaqshaǵa ornalasqan bala kezekten shyǵarylady degen pýnkt bar. Bul jeke kásipkerlerdiń klientteriniń turaqty bolýyna kómektesedi", - dedi Noǵaev.
Aita keteiik, qazir oblysta jeke menshik 30 balabaqsha bar. Onyń 28-i Atyraý qalasynda, bireýi Maqat, ekinshisi Jylyoi aýdanynda jumys istep tur. Mahambet aýdanynda bul iske bir kásipker qyzyǵyp otyr. Qalǵan aýdandarda jeke balabaqsha joq. Al oblysta barlyǵy 303 mektepke deiingi uiym bar. Onyń 164-i balabaqsha, 139-y shaǵyn ortalyq.
