Atyraý munai óńdeý zaýyty Jaiyq sýynyń ornyna káriz tazartý ǵimaratynan shyqqan sýdyń óńdep paidalanýy múmkin. Bul týraly oblys ákimi Mahambet Dosmuhambetov ortalyq kommýnikatsiialar qyzmetinde ótken brifingide aitty, dep habarlaidy QazAqparat.
«Atyraý munai óńdeý zaýyty tehnologiialyq protseske Jaiyqtyń sýyn paidalanady. Baǵana aityp kettim. Biz zaýytpen tiisti jumystardy júrgizip jatyrmyz. Olar káriz tazartý ǵimaratynan shyqqan sýdy tazartyp paidalaný jobasyn qolǵa alyp jatyr. Zaýyt úlken, birneshe protsesi bar. Olar kez kelgen sýdy paidalanbaidy. Ózderiniń talaptary bar. Qazir sýdyń sapasyn sol talaptarǵa sáikestendirip, úilesimdi bolsa, zaýytqa paidalanýǵa bolady degen ózara aldyn ala túsinistik bar. Onyń bári sáikes bolǵanda jumysty uiymdastyramyz dep otyrmyz», - dedi aimaq basshysy.
Atalǵan sharada Mahambet Dosmuhambetov táýelsizdik jyldary Atyraý oblysyna 31 trln teńge investitsiia tartylǵanyn atady.
Táýelsizdik jyldary oblysta 2 200 shaqyrymnan astam avtomobil joly salynyp, jóndeldi. Oblys turǵyndarynyń tabiǵi gazben qamtamasyz etilýi 12%-dan 99,7%-ǵa deiin, ortalyqtandyrylǵan sýmen jabdyqtaý 35%-dan 99,3%-ǵa deiin ósti.
Osy kezeńde oblys halqynyń sany bir jarym ese artyp, taiaýdaǵy sanaqtyń qorytyndysy boiynsha 665 myń adamǵa jetti», - dedi ákim.
