Atyraý oblysynyń Jylyoi aýdanyndaǵy Teńiz ken ornynda merdiger kompaniiada eńbek etetin jumysshy sýitsid jasady, dep habarlaidy QazAqparat.
Bul derekti oblystyq politsiia departamentiniń baspasóz qyzmeti rastady.
Teńiz – elimizdegi eń iri ken orny. Onda qazaqstandyq kompaniialarǵa qosa, sheteldiktermen birlesken birneshe kásiporyn merdigerlik jumysqa tartylǵan. Sondai kompaniianyń qatarynda «Senimdi qurylys» JShS bar. Atalǵan seriktestikte júzdegen adam jumys isteidi. Seriktestiktiń bir jumysshysy 5 shildede túngi mezgilde ózine qol jumsaǵany anyqtalyp otyr.
«Bizdiń kompaniiaǵa merdiger kásiporyn – «Senimdi qurylys» JShS qyzmetkerleriniń biri tirshilik belgilerinsiz tabylǵany týraly habar berildi. Bul týraly tiisti memlekettik organdarǵa der kezinde habarlandy», - dep málimdedi «Teńizshevroil» JShS-niń baspasóz qyzmetinen.
Túngi aýysymǵa shyǵyp, jumys ornynda asylyp qalǵan jumysshynyń jasy 28-de. Onyń denesin birge jumys isteitin áriptesteri taýyp alǵan. Jumysshynyń ózine qol jumsaýyna ne sebep bolǵany ázirge belgisiz.
Oblystyq politsiia departamentiniń baspasóz qyzmetinen málim etkendei, atalǵan derekke bailanysty tekserý men tergeý amaldary bastaldy.
