Atyraý oblysynda janarmai tasityn kóliktiń 27 jastaǵy júrgizýshisi joǵalyp ketti, dep habarlaidy QazAqparat.
Oblystyq tótenshe jaǵdailar departamenti baspasóz qyzmetiniń aqparatyna qaraǵanda, «Ýral» kóliginiń júrgizýshisi 12 aqpanda ken ornyna barý úshin jolǵa shyǵyp ketken.
«Biraq, Atyraý qalasynan jolǵa shyqqan júrgizýshiniń Maqat aýdanyndaǵy «Qaratal» ken ornyna jetpegeni anyqtalyp otyr. Bul týraly departamenttiń dispetcherlik pýltine búgin, 14 aqpanda saǵat 01:30-da habar tústi. Kólik júrgizýshisiniń jasy – 27-de. Ol «Arna» JShS-de janarmai tasityn «Ýral» kóligin júrgizýshi bolyp jumys isteidi. Ony izdestirý jumystary búgin, 14 aqpanda túnde bastaldy», - dep habarlady departamenttiń baspasóz qyzmeti.
Joǵalǵan júrgizýshini izdestirýge túnde №8 órt sóndirý bóliminen 3 qyzmetkeri men 1 «ÝAZ» kóligi men týystary jumyldyryldy. Al, tańerteń saǵat 06:20-da jedel-qutqarý jasaǵynyń 3 qutqarýshysy men 1 «TREKOL» jol talǵamaityn kóligi, «Arna» JShS-niń 3 qyzmetkeri men 1 tehnika, sondai-aq, týystary qosyldy.
«Izdestirý jumystary Maqat aýdanyndaǵy Dossor kentinen 40 shaqyrym jerde jalǵasyp jatyr. «Qaratal» ken ornyna jaqyn mańda áýeden izdestirýge sheshim qablydandy. Sol sebepten, oǵan «Qazaviaqutqarý» AQ-na qarasty MI-8 tikushaǵy ekipajynyń 4 múshesi, tótenshe jaǵdailar departamentiniń 3 qyzmetkeri, týystarynan 3 adam tartyldy. Ázirge izdestirý jumystary nátije bergen joq», - dep málim etti departamenttiń baspasóz qyzmetinen.
