Atyraý oblysynyń Inderbor kentinde zar zaman aqyny Murat Móńkeuly men bard aqyn Tabyldy Dosymovqa arnalǵan eskertkish qoiyldy, dep habarlaidy "Ult aqparat".
Murat baba eskertkishiniń avtory - QR sýretshiler odaǵynyń múshesi Quttybek Jaqyp. Biiktigi 7 metr bolatyn eskerkish taza qoladan quiylǵan. Eliniń táýelsizdigin ańsap jyr tolǵaǵan maitalman jyrshy, termeshi retinde Murat Móńkeuly halyq arasynda tanylǵan. Saltanatty sharaǵa qatysqan Atyraý oblysy ákiminiń birinshi orynbasary Serik Shapkenov aimaq basshysy atynan búgingi aitýly merekemen quttyqtady.
«Qazaqtyń zar zaman aqyny Murat Móńkeulyn tanymaityn qazaq joq. Óziniń rýhqa toly óleńderimen halyq jadynda máńgi saqtalady. Búgingi bizdiń mindetimiz - uly tulǵalarymyzdy ulyqtaý. Osy arqyly jas urpaqty tárbieleýimiz kerek. Búgin Inderbor kentinde Murat Móńkeuly men Tabyldy Dosymovqa arnalǵan eskertkish boi kóterdi. Ashylǵaly turǵan eki eskertkish qutty bolsyn», - deidi Serik Shapkenov.
Sonymen qatar, qazaqtyń tuńǵysh bard aqyny Tabyldy Dosymovqa arnalǵan eskertkishtiń de saltanatty ashylýy ótti. Sharaǵa Tabyldynyń zamandastary, qoǵam qairatkerleri qatysty. Biiktigi 2 metr 60 sm bolatyn eskertkish taza qoladan quiylǵan. Tabyldy aqynnyń 45 jasynda ómirden ótýin bildiretin 4,5 metrlik granit tasqa óleńderi jazylǵan. Sondai-aq, Tabyldy murasynyń keiingi urpaqqa jalǵasýyn beineleitin granittyń ushar basynda qustar beinelengen. Eskertkishtiń avtory - QR sýretshiler odaǵynyń múshesi Baqytbek Muhametjanov.
«Men qazaqpyn» dep jahanǵa jar sala jyrlaǵan jalyndy aqyn kindik qany tamyp, ómiriniń sońǵy kúnderin ótkizgen týǵan topyraǵynda búgin sáýletti eskertkish boi kóterip otyr. Tabyldy qazaq jadynda máńgilik saqtalady. Murat Móńkeuly azattyqty armandasa, Tabyldy biiktikti ańsady. Eki tulǵanyń búginde armany oryndaldy», - deidi aqyn, Tabyldynyń zamandasy Svetqali Nurjan.
Aita keteiik, qazaqtyń zar zaman aqyny Murat Móńkeuly men bard aqyn Tabyldy Dosymov Inder aýdanynda jerlengen.
