Batys Prorva ken ornynda tótenshe jaǵdai: 20 metrlik gaz alaýy, órtti sóndirý múmkin bolmai tur, dep habarlaidy Ult.kz.
6 naýryzda «Embimunaigaz» AQ-qa qarasty Batys Prorva ken ornyndaǵy №437 uńǵymasynda nasos-kompressorlyq qubyrdy (NKQ) túsirý kezinde gaz atqylady. Atylǵan gaz janyp, biiktigi shamamen 20 metrlik alaý paida boldy.
Beiresmi aqparatqa sáikes, qaza tapqandar men jaraqat alǵandar joq, degenmen, órtti áli tolyq sóndirý múmkin bolmai tur.
Aimaq qorshaýǵa alynyp, qalpyna keltirý jumystary júrgizilýde.
«Embimunaigaz» baspasóz qyzmeti oqiǵany rastady jáne jedel shtabtyń tiisti sharalardy qabyldaǵanyn málimdedi.
