Atyraý oblysy Isatai aýdanynyń ortalyǵy Aqqystaý aýylynda halyq batyry, XVIII ǵasyrdaǵy sońǵy han biligine qarsy ult-azattyq kóterilistiń qolbasshysy bolǵan Isatai Taimanulyna eskertkish ornatyldy, – dep habarlaidy «Ult aqparat».
Atyraý oblysynyń Óńirlik kommýnikatsiialar qyzmetiniń málimetinshe, Isatai Taimanulyna arnalyp salynǵan eskertkishtiń avtory QR sýretshiler odaǵynyń múshesi, músinshi Serik Mateniiazov. Biiktigi 12 metr bolatyn eskertkish taza qoladan quiylǵan.
Saltanatty sharaǵa arnaiy qatysqan oblys ákiminiń birinshi orynbasary Serik Shapkenov Isatai batyr eskertkishin respýblikadaǵy eń eńseli ári tuǵyrly músinniń biri ekendigin atap ótti.
– Mundai shoqtyǵy biik alyp eskertkishtiń naqty Isatai aýdanynda ashylýy zańdy qubylys.Bul istiń basy-qasynda bolyp, oiǵa alǵan jospardyń oidaǵydai oryndalyp, ýaqytyly ornatylǵany úshin jergilikti jaýapty tulǵalarǵa alǵys bidiremin. Búgingi bizderdiń mindetimiz – uly tulǵalarymyzdy ulyqtaý. Osy arqyly óskeleń urpaqty tárbieleýimiz kerek. Naiza ustaǵan aibarly Isatai batyr eskertkishi respýblikadaǵy eń eńseli ári tuǵyrly músin. Barsha isatailyqtardy aitýly merekemen quttyqtaimyn, – deidi Serik Shapkenov.
Bir minýt únsizdikten soń eskertkishti oblystyq ardagerler qoǵamynyń tóraǵasy Qatimolla Rizýanov, oblystyq aýǵan soǵysy ardagerleri qoǵamy tóraǵasynyń orynbasary Beiimbet Narimanuly jáne aýǵan soǵysy jaýyngeriniń jesiri Qalima Abýova ashty.
