Atyraý oblysynda bir táýlikte 85 adam koronavirýsqa shaldyqty, dep habarlaidy "Ult aqparat".
Oblystyq densaýlyq saqtaý basqarmasy baspasóz qyzmetiniń aqparatyna qaraǵanda, qaýipti indetke shaldyqqan naýqastardyń deni – 58 jumysshy Teńiz kenishinde anyqtalyp otyr. Al Atyraý qalasynda 15 adam koronavirýs infektsisyn juqtyrǵan. Sondai-aq, Jylyoi aýdanynda – 4, Qyzylqoǵada – 3, Qurmanǵazyda – 3, Mahambet aýdanynda 2 adamnan qaýipti virýs tabylǵan.
«Sońǵy málimetke sáikes, qazir 231 adam úi jaǵdaiynda emdelip jatyr. Oblystyq infektsiialyq statsionarda 100, aýdandardaǵy statsionarlarda 43, Teńiz ken ornyndaǵy statsionarda 806 adam em qabyldaýdy jalǵastyrýda», - dep habarlady basqarmanyń baspasóz qyzmetinen.
Ótken táýlikte koronavirýstan 125 adam saýyǵyp shyqqan.
