Foto: Atyraý oblysy TJD
Atyraý oblysynda 1 qańtarda joǵalǵan er adam kórshi aýyldan tabyldy, dep habarlaidy QazAqparat.
Atyraý oblystyq politsiia departamenti baspasóz qyzmetiniń aqparatyna qaraǵanda, Qurmanǵazy aýdanynyń Resei Federatsiiasymen shekarasyndaǵy Kóptoǵai selolyq okrýginen joǵalyp ketken er adam kórshiles Shortanbai aýylynan tabylǵan.
«Shortanbai aýylyndaǵy dúken satýshysy men ýchaskelik politsiia inspektory joǵalǵan er adamdy tanyp, jedel áreket etken. Sonyń nátijesinde júike aýrýlarymen esepte turǵan 51 jastaǵy er adam aǵaiyn-týystaryna jetkizildi. Týysqandarynyń suraýy boiynsha budan ózge aqparatty jariialai almaimyz», -dep málim etti politsiia departamentiniń baspasóz qyzmeti.
Al, oblystyq tótenshe jaǵdailar departamentiniń qoǵammen bailanys tobynan málim etkendei, Qurmanǵazy aýdanyndaǵy Kóptoǵai selolyq okrýginiń turǵyny 1 qańtarda joǵalyp ketken. Týystary onyń joǵalǵany týraly habardy 2 qańtarda bergen.
«Atalǵan selolyq okrýg Qurmanǵazy aýdandyq tótenshe jaǵdailar bólimine qarasty №7 órt sóndirý bóliminen 60 shaqyrym qashyqtyqta ornalasqan. Soǵan qaramastan, atalǵan bólimniń qutqarýshylary 2023 jyldyń 1 qańtar kúni úiinen belgisiz baǵytqa shyǵyp, qaita oralmaǵan 1972 jylǵy er adamdy izdestirýdi toqtatqan joq. Bugin, 4 qańtarda saǵat 17:00 kezinde tabylǵan er adam meditsinalyq kómekti qajet etpedi», -dep habarlady departamenttiń qoǵammen bailanys tobynan.
Iz-túzsiz joǵalǵan turǵyndy izdestirýge 8 adam men 3 tehnika tartylǵan. Onyń ishinde tótenshe jaǵdailar bóliminen 6, aýdandyq politsiia bóliminiń 2 qyzmetkeri bar. Sondai-aq, izdestirý jumystaryna jergilikti atqarýshy organ men aýyl turǵyndary qosylǵan.
